“Челси” “Манчестер Юнайтед”га Алехандро Гарначо бўйича таклиф билан чиқди

Лондоннинг “Челси” клуби “Манчестер Юнайтед” вингери Алехандро Гарначони ўз сафига қўшиб олишни истамоқда. Бу ҳақда инсайдер Фабрицио Романо ўзининг ижтимоий тармоқлардаги саҳифаси орқали хабар берди.

Манбага кўра, “аристократлар” “қизил иблислар”га аргентиналик ярим ҳимоячини ўз футболчиларидан бири билан алмаштиришни таклиф қилган. “Челси” “Манчестер Юнайтед” раҳбариятига қуйидаги тўрт футболчидан бирини танлаш имкониятини таклиф этган: Николас Жексон (ҳужумчи), Кристофер Нкунку (ҳужумчи), Аксел Дисаси (ҳимоячи) ва Ренату Вейга (ҳимоячи).

Бироқ “Манчестер Юнайтед” лондонликларнинг ушбу таклифига рад жавобини берган. Клуб раҳбарияти Гарначони фақат нақд пул эвазига қўйиб юборишга тайёр. Сабаби унинг трансферидан тушадиган маблағни жамоанинг бошқа позицияларини кучайтиришга йўналтириш режалаштирилган.

Аввалроқ “Челси” юқорида тилга олинган футболчиларни янги бош мураббий Энсо Мареска режаларига кирмагани сабабли сотмоқчи экани ҳақида хабарлар чиққан эди. Шу билан бирга, Гарначонинг ҳам “Манчестер Юнайтед”ни тарк этмоқчи экани, ҳаттоки ўз хизматларини Мадриднинг “Реал” клубига таклиф қилгани ҳақида миш-мишлар тарқалган.