19-iyul kuni Vyetnamda bortida 53 kishi bo‘lgan sayyohlik kemasi ag‘darilib ketdi. Hodisa oqibatida kamida 34 kishi halok bo‘lgan, 8 kishi bedarak yo‘qolgan. Bu haqda Vyetnamning VnExpress internet portali xabar bermoqda.
Kuangnin viloyati ma’muriyatining ma’lum qilishicha, kema mahalliy vaqt bilan soat 12:55 atrofida safarga chiqqan. Soat 13:30 da kema to‘satdan bo‘ronga duch kelib, ag‘darilgan, 14:05 da esa GPS signali yo‘qolgan. Voqea sodir bo‘lgan hududda o‘sha paytda kuchli shamol, do‘l va chaqmoq bilan yomon ob-havo hukm surgan.
Hodisa joyiga qutqaruv bo‘linmalari — chegara xizmati, harbiy-dengiz floti, politsiya va o‘nlab kemalar yetib kelgan. Vyetnam harbiy-dengiz kuchlari uchta kema, ikkita kater va 30 nafar harbiy xizmatchini jo‘natgan. G‘avvoslar qidiruv ishlarini murakkab sharoitlarda olib borgan. Kuchli oqim, yomon ko‘rinish va cho‘kkan kemaning ulkan tuzilishi operatsiyalarni qiyinlashtirgan.
Bortda 53 kishi bo‘lgan sayyoh bo‘lgan. Hodisa oqibatida kamida 34 kishi halok bo‘lgan, 8 kishi bedarak yo‘qolgan. 11 kishini qutqarishga erishilgan.
Qutqarilganlar orasida hushida bo‘lgan, biroq ko‘plab jarohatlar olgan 10 yoshli bola va qisman suv bosgan kayutadan deraza orqali chiqarib olingan 14 yoshli o‘smir ham bor.
Kema yo‘lovchilarining aksariyati Xanoy aholisi bo‘lib, ular orasida 20 dan ortiq bola bo‘lgan. Eng kichik yo‘lovchi atigi 3 yoshda, eng kattasi esa 53 yoshda edi.
Kechqurun fojia joyiga Vyetnam bosh vaziri Fam Min Chin topshirig‘i bilan bosh vazir o‘rinbosari Chan Xong Xa yetib kelgan. U halok bo‘lganlarning oila a’zolariga hamdardlik bildirib, qutqaruv operatsiyasini o‘tkazish, jabrlanganlarga yordam ko‘rsatish va halokat sabablarini aniqlash uchun barcha kuchlarni safarbar etishni buyurgan.
Dastlabki ma’lumotlarga ko‘ra, kema 2015 yilda qurilgan bo‘lib, uzunligi 24 metr, yuk ko‘tarish qobiliyati 12 tonna va 48 yo‘lovchiga mo‘ljallangan edi. Kema oxirgi marta 2023-yil yanvar oyida texnik ko‘rikdan o‘tkazilgan.
Izoh (0)