Ҳиндистон Олий суди пойтахт Деҳли кўчаларини дайди итлардан зудлик билан тозалаш бўйича қарор чиқарди. Бу ҳақда The Guardian хабар берди.
Қарорга мамлакатдаги хавотирли даражадаги қутуриш ҳолатлари ва ит ҳужумлари сабаб бўлган. Узоқ йиллардан бери давом этиб келаётган дайди итлар муаммоси 11 август куни тегишли қарор чиқарилиши билан якунланди.
Суд маҳаллий ҳокимиятларга барча дайди итларни, стерилизация қилинган ёки қилинмаганидан қатъий назар, тутиш, уларни стерилизация ва эмлашдан ўтказиш ҳамда янги қуриладиган бошпаналарга жойлаштиришни буюрган. Бунинг учун ҳокимиятларга 8 ҳафта муддат берилган. Шунингдек, жараён устидан камера кузатуви ўрнатилиши ва ҳайвонларнинг Деҳли кўчаларига қайтарилмаслиги шарт қилиб қўйилмоқда. Судьялар зудлик билан ҳаракат қилиш зарурлигини таъкидламоқда.
“Кўчалар дайди итлардан тозалансин. Болалар велосипедда юрганда ва ўйнаганда ўзини хавфсиз ҳис қилиши керак. Ёши катталар ҳам сайрга чиққанда ўзини хотиржам сезиши зарур”, деди судья Пардивала.
Деҳли ва бошқа шаҳарларда дайди итларни назорат қилиш баҳсли масала саналади. Айрим аҳолига кўра, бу ҳайвонлар хавфсизликка катта таҳдид солади, бошқалар эса уларни аҳолининг бир қисми деб билади. Суд қарорига қарши пойтахт марказида ўтказилган норозилик юришида иштирок этган Нишима Бҳагат шундай деди:
“Биз гапира олмайдиган ҳайвонлар билан бирдаммиз. Итлар гапира олмайди. Уларни қафасларга тиқиб қўйиш жоиз эмас. Итларни яшаб келган жойидан кўчиришга қаршимиз”.
Ҳиндистон дунёда қутуриш касаллиги бўйича энг юқори кўрсаткичга эга. Маълумотларга кўра, мамлакатда ҳар йили тахминан 5700 киши, Жаҳон соғлиқни сақлаш ташкилотига кўра эса, 20 минггача одам қутуриш оқибатида вафот этади.
Деҳлида 2012 йилги сўнгги рўйхатга олишда 60 минг дайди ит борлиги қайд этилган бўлса, ҳозир бу рақам қарийб 1 миллионга етгани тахмин қилинмоқда. Ит тўдалари парклар, қурилиш майдонлари ва турар жойлар атрофида доимий кезиб юради. Шу сабаб, болалар ва қарияларга ҳужумлар тез-тез қайд этилади. Пойтахтда 2025 йилнинг январь–июнь ойларида 35,198 та ит тишлаш ва 49 та қутуриш ҳолати ҳақида хабар қилинган.
Бир қатор ҳайвонларни ҳимоя қилиш ташкилотлари Деҳлининг бу қарорни амалий жиҳатдан имконсиз ва ғайриинсоний деб баҳоламоқда. Ҳиндистон ҳайвонларни ҳимоя қилиш федерацияси раҳбари Bharatи Рамачандран стерилизация, эмлаш ва кенг кўламли тарғибот ишларини кучайтиришга чақирмоқда. “PETА Индиа” вакили Мини Аравиндан эса юз минглаб итлар учун етарли бошпана қуриш ва уларни таъминлаш жуда қиммат ва амалда бажариб бўлмас иш эканини билдирган.
Изоҳ (0)