Буюк Британия Ҳарбий-денгиз кучлари таркибига кирувчи Денгиз савдо ташкилоти (UKMTO) Қизил денгизда жойлашган Рас-Исо портидаги кемага ҳужум уюштирилганидан хабар топди. Бу ҳақда ташкилот ўзининг Twitter’даги саҳифаси орқали маълум қилди.
Маълум қилинишича, ҳолат бўйича тергов ўтказилмоқда. Кема қайси давлат байроғи остида ҳаракатлангани айтилмаган.
Reuters агентлигининг ёзишича, Рас-Исо яқинида кемалар билан боғлиқ можаро охирги марта 2019 йилда содир бўлган. Ўшанда хусийлар Саудия Арабистонига тегишли битта ҳамда Жанубий Кореянинг иккита кемасини эгаллаб олганди.
2021 йилнинг август ойида эса Уммон кўрфазининг БАА қирғоқларида яна бир кема эгаллаб олинган. UKMTO мазкур ҳолатни «кемани потенциал ўғирлаш» деб баҳолаган. Sky News манбалари Панама байроғи остида ҳаракатланган Asphalt Princess танкери эгалланганини маълум қилганди. Қуролланган шахслар тез орада кемани тарк этган ва кўнгилсиз ҳодиса шу билан тугаган эди.
Шу куннинг ўзида ОАВда БАА қирғоқларида камида тўртта нефть танкери номаълум сабабларга кўра, бошқарувни йўқотгани ҳақида ёзганди. Кемалар Гаяна, Сингапур, Ҳиндистон ва Вьетнам байроқлари остида ҳаракатланган.
Аввалроқ Эрон Аден кўрфази яқинида нефть танкерига қарши қароқчилар ҳужумининг олдини олгани, АҚШ БАА яқинида қўлга олинган танкердаги Эрон нефтини 110 млн долларга сотиб юборгани тўғрисида хабар берилганди.
Изоҳ (0)