Рақобат қўмитаси букмекерлик хизматларини реклама қилган яна икки нафар вайнерга тегишли чоралар кўрилганини маълум қилди.
Қўмита томонидан ахборот ресурслари ҳамда ижтимоий тармоқлар орқали тарқатилаётган рекламаларнинг амалдаги қонунчилик ҳужжатлари талабларига мослиги юзасидан тизимли ўрганиш ва таҳлил ишлари олиб борилганда ижтимоий тармоқларда бир неча юз минглаб кузатувчиларига эга бўлган блогерлар ўзларига тегишли саҳифаларда букмекерлик хизматларини реклама қилаётгани кузатилган.
Хусусан, Melbet букмекерлик товар белгисидан фойдаланган, шунингдек, қимор ўйинларини тарғиб қилувчи саҳна кўринишлари орқали жойлаштирилган видео-роликлар қуйидаги шахсларга тегишли экани аниқланган:
- фуқаро Шамсиддинов Амирхон Ўткир ўғли (амирхон_узбек);
- фуқаро Илёсов Дониёр Маъруф ўғли (доник_краш).
Юқоридаги ҳолатлар юзасидан Рақобат қўмитаси томонидан блогерлар белгиланган тартибда маъмурий жавобгарликка тортилиб, тегишли ҳужжатлар судга юборилди.
23 июлда қимор ўйинларини реклама қилган 4 нафар вайнер судга берилганди. Улар ҳам Melbet букмекерлик товар белгисидан фойдаланган.
“Реклама тўғрисида”ги қонунга кўра, мамлакат ҳудудида қимор ўйинлари ва таваккалчиликка асосланган бошқа ўйинларни реклама қилиш тақиқланади. Бундай фаолиятни реклама қилиш тегишли жавобгарликка сабаб бўлади. Рақобат қўмитаси 2024 йил ва 2025 йилнинг тўрт ойида 185 та ҳолатда тотализаторлик ва букмекерлик идоралари фаолиятига оид рекламаларда камчиликларни аниқлаган.
Изоҳ (0)