АҚШ президенти Дональд Трамп 4 июль куни унинг маъмурияти савдо ҳамкорларига 1 августдан бошлаб Қўшма Штатларга товарлар етказиб бериш учун тўланиши керак бўлган божлар миқдори ҳақидаги хабарномаларни юборишни бошлашини маълум қилди.
Маълум қилинишича, Трамп журналистларга баъзи ҳолларда божлар 60-70 фоизни, бошқа ҳолларда эса 10-20 фоизни ташкил этишини айтган.
“Ўйлайманки, тўққизинчи санагача (9 июлгача) биз ҳамма ишни тугатамиз”, дея Трампнинг сўзларини келтиради Bloomberg.
Таъкидланишича, президент илгари божларнинг юқори чегарасини пастроқ - 50 фоиздан ошмайдиган даражада белгилаган.
Трамп апрель ойи бошида оширилган импорт божларини жорий этишни эълон қилган, бироқ кейинчалик бу чорани 90 кунга кечиктириб, шу вақт ичида савдо келишувлари бўйича музокаралар олиб борган эди. Муддат 9 июлда тугайди ва аввалроқ президент унинг узайтирилмаслигига ишора қилганди. Шу вақт ичида Қўшма Штатлар фақат учта савдо битимини тузишга эришди. Жумладан, Вьетнам, Хитой ва Буюк Британия билан асосий келишувлар.
Айни пайтда Қўшма Штатлар бир қатор асосий ҳамкорлар, жумладан, Европа Иттифоқи, Япония, Ҳиндистон ва Жанубий Корея билан савдо шартномалари бўйича музокараларни давом эттирмоқда.
Аввалроқ Трамп Япония билан музокаралардаги силжишдан норозилигини билдирган ва мамлакат АҚШга товарлар етказиб бериш учун 30-35 фоиз миқдорида бож тўлашига йўл қўйганди. Молия вазири Скотт Бессент Қўшма Штатлар Ҳиндистон билан келишувга яқинлашганини айтди, бироқ Япония ва Жанубий Корея билан музокаралар сўнгги ҳафталарда деярли олдинга силжимаган.
Изоҳ (0)