Вьетнам июль ойидан бошлаб саккизта жиноят тури учун ўлим жазосини бекор қилади. Бу жиноятлар қаторига пора олиш ва ҳукуматни ағдаришга қаратилган ҳаракатлар ҳам киради. Бу ҳақда Reuters хабар берди.
Парламент бир қатор жиноятлар учун ўлим жазосини бекор қилувчи Жиноят кодексига ўзгартиришни бир овоздан маъқуллаган. Қарор 12 миллиард долларлик фирибгарлик иши бўйича судланаётган бир миллиардернинг ҳаётини сақлаб қолади.
Энди ўлим жазоси қўлланилмайдиган жиноятлар қаторига давлат мулкини бузиш, қалбаки дори-дармонлар ишлаб чиқариш, тинчликка таҳдид солиш, тажовузкор урушлар бошлаш, жосуслик ва гиёҳванд моддаларни ташиш ҳам киради. Ушбу жиноятлар учун максимал жазо умрбод қамоқ жазоси бўлади. Юқоридаги жиноятлар бўйича 1 июлга қадар ўлимга ҳукм қилинганлар, бироқ ҳали қатл этилмаганлар жазоси умрбод қамоқ жазосига алмаштирилади.
Шунга қарамай, Вьетнамда ҳали ҳам 10 та жиноят тури учун ўлим жазоси сақланиб қолади. Улар қаторига қотиллик, давлатга хиёнат, терроризм ва болаларга жинсий тажовуз киради. Гиёҳванд моддалар савдоси ҳам ўлим жазоси билан жазоланадиган жиноят бўлиб қолмоқда.
Вьетнамда ўлим жазоси бўйича аниқ статистика давлат сири ҳисобланади, шунинг учун нечта одам ҳукм қилингани номаълум. 2011 йилдан бери мамлакатда отиб ўлдириш бекор қилиниб, ягона қатл усули сифатида ўлдирувчи инексия (дори юбориш) қўлланилади.
Маълумот ўрнида, мамлакатда кўчмас мулк тадбиркори Труонг Мй Лан 2024 йил 12 миллиард долларлик пора иши бўйича ўлим жазосига ҳукм қилинган эди. Унга чиқарилган ҳукм автоматик умрбод қамоқ жазосига ўзгаради.
Изоҳ (0)