Исроил ҳарбийлари “Исёнкор шер” операцияси бошланганидан буён бутун Эрон ҳудудида 1,1 мингта турли объектларга ҳужум қилди. Бу ҳақда Исроил мудофаа армияси (САХАЛ) расмий вакили, бригада генерали Эфи Дефрин брифингда маълум қилган.
“Ҳозирги пайтга келиб биз (САХАЛ) бутун Эрон бўйлаб 1,1 мингдан ортиқ турли объектларга ҳужум қилдик”, деди у.
Дефрин Исроил мудофаа армияси режага мувофиқ тизимли равишда ишлаётгани ва “барча мақсадларга эришилмагунча” буни давом эттиришини билдирган.
“Биз (САХАЛ) Эроннинг ҳамма жойида ҳужумларни давом эттирамиз. Эрон қаршилик кўрсатмоқда, улар жанг қилмоқда. Аммо биз ҳаво устидан назоратни ўрнатдик ва бу назоратни сақлаб қоламиз”, дея қўшимча қилди Дефрин.
Исроил армияси вакилининг та`кидлашича, Теҳрондаги бир нечта қурол-яроғ ва ракета ишлаб чиқариш объектларига зарба берилган.
“Биз (Эрон) ядровий таҳдидининг барча элементларини зарарсизлантириш бўйича режали ишларни олиб бормоқдамиз. Шунингдек, уларнинг ер-ер ва ер-ҳаво ракеталари салоҳиятига ҳам сезиларли зарар етказмоқдамиз. Бундан ташқари, Исроил ҳарбий-ҳаво кучлари самолётлари Теҳрондаги бир нечта қурол-яроғ ва ракета ишлаб чиқариш объектларига зарба берди”, дейди Исроил армияси вакили.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)