Эрон жанубидаги Бушер портида 15 июль куни портлаш содир бўлган ва еттита ҳарбий кема ёниб кетган. Ҳодиса оқибатида ҳеч ким талафот кўрмаган, портлашни келтириб чиқарган сабаблар номаълумлигича қолмоқда, деб ёзган Reuters. Fox News нашрининг қайд этишича, Бушерда Эрондаги ягона атом электростанцияси жойлашган.
Охирги ҳафталар давомида Эронда саноат корхоналари ва ҳарбий объектларда бир нечта шубҳали ҳодисалар содир бўлган, иншоотларнинг аксарияти мамлакатнинг ядро бўйича дастурига бевосита алоқадор.
13 июлда мамлакат шимоли-ғарбидаги Хуросон вилоятида табиий газ ишлаб чиқарувчи объектда портлаш содир бўлган ва ёнғин келиб чиққанди.
4 июлда Эрон ғарбидаги электростанцияда ҳам портлаш ва ёнғин содир бўлган, ундан бир кун аввал Натанзадаги уранни бойитиш корхонасида ёнғин кузатилган.
Июнь охирида Парчин ҳарбий базасида газ сақланадиган объект портлаб кетган. Барча ҳолатларда қурбонлар, жароҳатланганлар, талафот етган бошқа бинолар ҳақида маълумот берилмаган.
Мавзуга доир: Теҳрондаги клиникада содир бўлган портлаш ва ёнғин оқибатида камида 13 киши ҳалок бўлди (видео)
Эроннинг АҚШ билан муносабатлари Дональд Трамп мамлакат президентлигига сайланганидан кейин кескин ёмонлашган. АҚШ Барак Обама администрация даврида тузилган ядро келишувидан чиққан. Трамп Эронни келишув шартларини бузганликда айблаган, бироқ бу борадаги далилларни тақдим этмаганди. 2020 йил январида мамлакатлар ўртасида қуролли низо келиб чиқишига бир баҳя қолди, АҚШ махсус хизмати ҳарбийлари Бағдодда Эрон ислом инқилоби муҳофизлари корпуси генерали Қосим Сулаймонийни ўлдирди. Эрон бунга жавобан АҚШнинг Ироқдаги ҳарбий базасига зарба берди, лекин мазкур ҳужум оқибатида ҳарбий базада ҳеч ким ҳалок бўлмаган. Ракета зарбалари бериш чоғида Теҳрондан ҳавога кўтарилган «Украина халқаро авиалиниялари» компаниясининг Boeing 737 самолёти хатолик сабабли уриб туширилган. Самолёт бортида бўлган 176 киши ҳалок бўлган.
Шундан сўнг, АҚШ Эронга қарши янги санкцияларни жорий қилди. Эронда эса Трампни ўлдириш учун 3 миллион доллар мукофот эълон қилинди.
Кейинроқ Эронда генерал Сулаймонийнинг ортидан жосуслик қилишда айбланган фуқаро ўлимга ҳукм қилинди.
The Washington Post’нинг ёзишича яқин ойларда Эрон ҳамда Исроил муносабатларида кескинлашадиган улкан воқеа содир бўлмаган. Аммо шу кунларда Эрон хакерларининг Исроилдаги сув иншоотлари тизимига киберҳужум уюштирган бўлиши мумкинлиги гумон қилинмоқда.
Изоҳ (0)