Эроннинг қувғиндаги валиаҳд шаҳзодаси Ризо Паҳлавий эронликларга мурожаат қилиб, олий раҳнамо Оятуллоҳ Али Хоманаий ҳукуматини ағдаришга чақирди. У тегишли чақириқни ўзининг Х ижтимоий тармоғига жойлади.
У Исроилнинг ҳужумлари фонида Эрон қулаш арафасида эканини айтиб, Хоманаийни танқид қилди.
Хоманаий худди қўрққан каламушдай ер остига яшириниб олган ва вазиятни бошқара олмаяпти. Бошланган жараён ортга қайтмас. Келажак порлоқ ва биз биргаликда тарихнинг бу кескин бурилишидан ўтиб кетамиз, деган у.
Паҳлавий йиллар давомида Эронни “уруш алангасидан асраб қолишга” ҳаракат қилганини даъво қилди. У Ислом республикасининг тугаши “эронликларга қарши 46 йиллик урушнинг якуни” бўлишини таъкидлади.
Режимнинг зулм тизими парчаланмоқда. Энди бу даҳшатли тушга бутунлай чек қўйиш учун умумхалқ қўзғолонининг ўзи кифоя. Ҳозир оёққа туриш, Эронни қайтариб олиш вақти келди. Келинг, ҳаммамиз бирлашайлик — Бандар Аббосдан Бандар Анзалигача, Шероздан Исфаҳонгача, Табриздан Заҳедонгача, Машҳаддан Аҳвозгача, Шаҳри Корддан Кирмоншоҳгача — ва бу тузумни ағдариб ташлаймиз, деган у.
Паҳлавий эронликларни ҳукумат қулашидан қўрқмасликка чақириб, Эроннинг келажаги ва равнақи учун режа борлигини қайд этган.
Биз қулашдан кейинги дастлабки юз кун учун, ўтиш даври учун ва миллий ҳамда демократик ҳукуматни ўрнатиш учун тайёрмиз. Бу ҳукумат Эрон халқи томонидан ташкил этилади ва Эрон халқи манфаатларига хизмат қилади.
Сўнгги кунларда менга кўплаб хабарлар йўллаётган ҳарбийлар, ҳуқуқ-тартибот ходимлари, хавфсизлик кучлари ва давлат хизматчиларига шуни айтмоқчиманки: қулаши муқаррар бўлган тузум учун Эрон халқига қарши турманг, деган у.
Собиқ валиаҳд шаҳзода хавфсизлик хизмати ходимларини халқ билан бирга бўлишга, келажакни қуришда иштирок этишга чақирган.
Ризо Паҳлавий 1967 йилдан бери Эроннинг валиаҳд шаҳзодаси бўлиб, отаси Муҳаммад Ризо Паҳлавийдан сўнг тахтни эгаллаши лозим эди, бироқ 1979 йилдаги Эрон Ислом инқилоби туфайли оиласи билан бирга Эрондан қочишга мажбур бўлган.
У ҳозирги Эрондаги мавжуд бўлган руҳонийлар бошқараётган ислом республикасининг асосий танқидчиларидан бири ҳисобланади. Эронда тақиқланган Эрон Миллий Кенгашининг асосчиси ва раҳбари саналади. Айни пайтда АҚШда истиқомат қилмоқда.
Изоҳ (0)