Исроил мудофаа кучлари Ливан жанубида эронлик генерал, “Ал-Қудс” махсус кучлари собиқ қўмондони Қосим Сулаймоний хотирасига қурилган ёдгорликка авиазарба берди. Бу ҳақда Al-Mayadeen телеканали хабар бермоқда.
Ёдгорликка ҳужум ҳақида Jerusalem Post ҳам ёзди. Газета қайд этишича, бир оз аввал Исроил армияси Ливан билан чегарадаги “Ҳизбуллоҳ” нишонларига зарба бераётганини эълон қилган.
Исроил армиясининг Telegram-каналида аниқлик киритишича, тунда “Ҳизбуллоҳ” кузатув пункти вайрон қилинган: гуруҳ жангчилари ушбу пунктдан Исроилнинг Рош-Ҳаникра вилояти йўналишида ракеталар отишда фойдалангани айтилмоқда.
Генералнинг ўлдирилиши
Генерал майор, Ислом инқилоби посбонлари корпусининг “Ал-Қудс” кучлари қўмондони Қосим Сулаймоний 2020 йил 3 январь куни Бағдод халқаро аэропорти яқинига берилган ракета зарбаси оқибатида ҳалок бўлганди.
Ўша куни АҚШ президенти (ўша пайтда) Дональд Трамп бу Америка махсус операцияси бўлганини тан олди. Унинг сўзларига кўра, Сулаймоний Эронда кўп сонли намойишчиларнинг ўлдирилишида иштирок этган, шунингдек, узоқ вақт давомида “минглаб америкаликларни ўлдирган ёки яралаган” ва “бундан ҳам кўпроқ одамларни ўлдиришни режалаштирган”.
Эрон 8 январдаги ҳужумга жавобан Ироқдаги Америка базаларини ўққа тутди; Вашингтон ҳужумда ҳарбий хизматчиларидан ҳеч бири ҳалок бўлмаганини таъкидлади. Шу куни Эрон ҳаво мудофаа тизимлари Теҳрондан Киевга учаётган Boeing 737-800 йўловчи самолётини уриб туширди. Эрон расмийлари дастлаб ҳалокатга алоқадорлигини рад этди, бироқ кейинчалик самолёт хатолик туфайли уриб туширилганини тан олди – оператор Boeingни қанотли ракета деб адашган. Авиаҳалокатда 176 киши вафот этди.
Эрон ҲАМАСни қўллаб-қувватламоқда
Фаластиннинг ҲАМАС ҳаракати Исроилга ҳужум қилган 7 октябрдан бери “Ҳизбуллоҳ” ва Исроил ўртасида фаол отишма давом этмоқда. Бош вазир Биньямин Нетаньяху ҲАМАСни йўқ қилишга ваъда берди, Исроил армияси Ғазо секторини бомбардимон қила бошлади.
Можаро бошланганидан кейин Эрон ҲАМАСни қўллаб-қувватлади. Теҳрон шунингдек, агар Исроил “Эронга, унинг манфаатлари ва фуқароларига ҳужум қилишга журъат этса” урушга аралашиши мумкинлигини билдирди. Эрон томони Исроил армиясининг Ғазо секторида режалаштирган қуруқлик операциясини қўпол хато ва қизил чизиқ деб атади.
Изоҳ (0)