Исроил ҳукумати Эрон билан кескинлик ортгани сабабли фуқароларига мамлакатдан чиқишни тақиқлади. Бу ҳақда Middle East Monitor хабар берди.
Маълум қилинишича, ҳукумат ички авиакомпанияларга исроиллик йўловчиларни халқаро рейсларга қўймасликни буюрган. Бунга Эроннинг Исроил аэропортларига эҳтимолий ҳужуми хавфи сабаб бўлмоқда. Исроилнинг асосий халқаро дарвозаси бўлган Бен-Гурион аэропорти “кейинги огоҳлантиришгача” ёпилган.
Қарор хавфсизлик идоралари раҳбарларининг аэропортларда одамлар тўпланиб қолиши ва Эрон жавоб зарбаси берган тақдирда кўплаб қурбонлар бўлиши мумкинлиги ҳақидаги ташвишларидан келиб чиққан. Исроил транспорт вазири Мири Регев бу борада қуйидагича баёнот берган:
Ҳозирги босқичда биз исроилликларнинг хорижга чиқишига рухсат бермаймиз. Чет элга кетаётганлар — бу мамлакатга ташриф буюрган одамлар: дипломатлар, сайёҳлар ва бошқалар, деган вазир.
У ҳозирда хорижда қолиб кетган 100 мингдан ортиқ Исроил фуқароларини қайтариш бўйича операция тайёрланаётганини таъкидлаган. Регев мазкур жараён “босқичма-босқич ва режали равишда” ўтказилишига ваъда берган.
Бироқ бу сиёсий норозиликларни келтириб чиқарган. Исроил Миллий бирдамлик партияси раҳбари ва Ҳарбий вазирлар маҳкамаси аъзоси Бенни Ганс вазирнинг сўзларини қоралаган.
Операция кутаётган кекса аёл; фарзандини Исроилда ёлғиз қолдирган ёш бева — булар уйга қайтиши керак бўлган минглаб кишилардан атиги иккитаси. Сизнинг вазифангиз, вазир, ҳукм чиқариш эмас, балки уларнинг хавфсиз қайтишини таъминлашдир, деган у.
Саёҳат чекловлари Исроилнинг Эроннинг Машҳад аэропортига мисли кўрилмаган ҳужуми ортидан киритилди. Эрон ҳали ҳам мазкур ҳужумга жавоб қайтармаган бўлса-да, аэропортлар эндиликда ҳужум нишонига айланиши мумкинлигидан хавотир кучайган.
Изоҳ (0)