АҚШлик Лиза Фаерман 4 мингдан ортиқ пазллар (қайта йиғиладиган расм) тўпламига эга бўлиб, Гиннеснинг рекордлар китобига киритилди. Бу ҳақда ташкилотнинг расмий сайтида эълон қилинди.
Лиза бундай турдаги ҳоббига 2019 йилдан бошлаб қизиқа бошлаган. Дастлаб у машҳур Ravensburger Puzzles компанияси маҳсулотларини сотиб олган. Ҳозирда унинг коллекцияси 4060 та тўпламдан иборат бўлиб, улар орасида 123 та Янги йил мавзусидаги пазллар, Дисней мультфильмлари, “Дўстлар” сериали, “Жеймс Бонд” фильмлари ва Hello Kitty бренди асосидаги мозайкалари мавжуд.
Унинг айрим тўпламлари жуда ноёб ҳисобланади. Масалан, “Юлдузлар жанги” фильмидаги Йода образига бағишланган пазлни у етти йил давомида излаган.
Шундан сўнг Лиза пазл йиғиш бўйича мусобақаларда қатнаша бошлаган. У АҚШ миллий чемпионатида уч марта, жаҳон чемпионатида эса бир марта иштирок этган:
“Мусобақалар мени анча ҳолдан тойдиради. Жуфтлик ва жамоавий баҳсларда қатнашишимнинг сабаби биргаликда ишлаш мен учун мароқлидир. Мен бу каби тадбирларни чин дилдан яхши кўраман. Бошқа пазл ишқибозлари билан танишиш, янги одамлар билан мулоқот қилиш ва рассомлар билан учрашиш менга завқ бағишлайди”, дейди Лиза.
Шуниси қизиқки, у ҳеч қачон рекорд ўрнатишни мақсад қилмаган:
“Мен ҳеч қачон жаҳон рекордини янгилашни хаёлимга ҳам келтирмаганман. Шунчаки пазлларга қизиққанман, холос”, дея қўшимча қилган у.
Лиза Фаерманнинг коллекцияси аввалги рекорддан икки баробар кўп. 2023 йилда америкалик эркак Жон Уолчек 2022 та пазл тўплами билан Гиннес рекордини қўлга киритган эди.
Изоҳ (0)