Канадалик актёр Райан Рейнолдс ва австралиялик актёр Ҳью Жекман Гиннес рекордлари китобига киритилди. Бу ҳақда “РБК” нашри хабар бермоқда.
“Дедпул ва Росомаха” комедиясининг расмий тизери эълон қилингандан сўнг дастлабки 24 соат ичида энг кўп кўрилган видеога айланди. Шу муносабат билан Гиннес рекорди ходимлари фильмда бош роллар — супер қаҳрамонларни ижро этган юлдузларга махсус сертификат тақдим этди.
“Дедпул ва Росомаха” тизерининг премьераси Super Bowl футбол ўйинлари финалида бўлиб ўтди. Тизер 11 февралдан 12 февралгача бўлган даврда онлайн платформаларда дунё бўйлаб 365 миллион марта томоша қилинди. Актёрларга рекорд ҳақидаги гувоҳнома ITV телеканалининг This Morning кўрсатувида Элисон Ҳеммонд билан ўтган суҳбатда топширилди.
Шунингдек, 47 ёшли Райан Рейнолдс Гиннес рекордлари китобининг яна бир сертификати билан ҳам тақдирланди. Бу сафар юлдуз Wreхham AFC футбол клубининг эгаси сифатида рекорд ўрнатди. Маълум бўлишича, Уэлснинг шимолида жойлашган “Рексем” клуби қадимий футбол стадиони ҳисобланади. 2024 йил 5 апрель ҳолатига кўра стадиондан 147 йил 31 кун давомида узлуксиз фойдаланилган.
“Бундай эътироф мен ва ота-боболарим учун улкан аҳамиятга эга”, деди Рейнолдс.
55 ёшли актёр Ҳью Жекман эса Гиннес рекордлари китобига бир неча йил аввал киритилган. 2019 йилда у 16 йил, 228 кун давомида Marvel оламидаги энг узоқ вақт рол ижро этган актёр сифатида рекорд ўрнатган.
Американинг “Дедпул” фильми 2016 йилда режиссёр Тим Миллер томонидан суратга олинган фантастик комедиядир. Фильмнинг янги қисмида 2009 йилда суратга олинган “Ғаройиб одамлар” фильми қаҳрамони Росомаханинг Дедпул билан тўқнашуви бўлиб ўтади ва улар биргаликда рақибларга қарши кураш олиб боради. “Дедпул ва Росомаха” комедиясининг жаҳон премьераси 26 июль куни бўлиб ўтиши кутилмоқда.
Изоҳ (0)