Хитойда янги юмшоқ ўйинчоқ оммалашмоқда. Wakuku номини олган ушбу ўйинчоқ Labubu’нинг арзон муқобили эканлиги айтилмоқда.
Чиқарилганидан бери атиги бир неча ой ўтиб, бу ўйинчоқ ижтимоий тармоқларни забт этди ва аллақачон савдо рекордларини ўрнатишга улгурди.
Қайд этилишича, Wakuku Labubu’нинг муваффақиятини такрорлаши, балки ундан ҳам ўзиб кетиши мумкин.
Эътиборли жиҳати шундаки, Wakuku ҳам Хитойда яратилган. Бироқ бу сафар машҳур ўйинчоқлар ортида Pop Mart эмас, балки Letsvan компанияси турибди. Янги ўйинчоқлар биринчи марта 2024 йилда сотувга чиқарилган эди.
Унга бўлган қизиқиш эса бир оз кейинроқ, 2025 йилнинг баҳорида юзага келди. Ўшанда Пекиндаги Минисо Ланд тадбирида ишлаб чиқарувчи харидорларга Wakuku’нинг панда кўринишидаги янги версиясини тақдим этган эди. Бу ҳақиқий шов-шувга сабаб бўлди — янги модел сотувчига рекорд даражадаги даромад келтирди ва фойда улуши 90 фоиздан ошиб кетди.
Шундан сўнг бренд Шанхай ва Нанкиндаги муваффақиятини мустаҳкамлади: 17 май куни чекланган дизайндаги “Тулки ва қуён” Wakuku сотувга чиқарилган куниёқ бутунлай сотиб тугатилди. Бир ой ўтгач эса, янги туркумлар дўконларга келтирилди ва атиги икки соат ичида барчаси сотиб олинди.
Ҳамманинг севимлисига айланиб улгурган Labubu каби Wakuku ҳам ёпиқ қадоқда чиқарилади — харидор айнан қайси шакл унга тегишли эканини фақат қадоқни очгандан кейин билади. Баъзи ўйинчоқлар сумкага осиб қўйиш мумкин бўлган брелок кўринишида ҳам тайёрланган. Бундан ташқари, иккала “ҳайвонча” ҳам оҳангдош номларга эга, лекин ўхшашликлар бунда тугамайди: Wakuku’нинг ташқи кўриниши жуда таниш туюлади.
Бироқ фарқлар ҳам мавжуд. Биринчидан, қаҳрамонлар юзлари билан ажралиб туради — Labubu’нинг ўзига хос тишли табассуми бор, Wakuku’нинг юзи эса кўпроқ инсонга ўхшайди. Бундан ташқари, янги ўйинчоқ анча арзонроқ нархи билан ажралиб туради: у 22 доллар туради, Labubu’нинг нархи эса тахминан 700 долларни ташкил қилади.
Қизиқ томони шундаки, ҳозирда Wakuku’га бўлган қизиқиш асосан Хитойда кузатилмоқда. Дастлаб Осиёда тарқалган Labubu билан ҳам худди шундай бўлган эди. Шунинг учун бу тренд яқин вақт ичида жаҳон миқёсига чиқиши эҳтимолдан холи эмас.
Изоҳ (0)