“Дедпул ва Росомаха” номли супер қаҳрамонлар ҳақидаги янги фильм жаҳон прокатида 1,086 миллиард доллар йиғиб, Р рейтинги тарихида энг юқори даромад келтирган фильмга айланди. Бу ҳақда Marvel компанияси ўзининг ижтимоий тармоқлардаги саҳифасида маълум қилди.
Илгари мазкур рекорд истеъдодли актёр Хоакин Феникс иштирокидаги “Жокер” фильмига тегишли эди. Фильм 2019 йилда чиққан ва касса даромадлари 1,078 миллиард долларни ташкил қилган.
Marvel ушбу қувончли ва муҳим кун муносабати билан фильмнинг турли мамлакатларда бўлиб ўтган премьерасидан иборат видеони тақдим этди:
“Дедпул ва Росомаха”нинг расмий тизери эълон қилингандан сўнг дастлабки 24 соат ичида энг кўп кўрилган видеога айланди. Фильмнинг премьераси эса дунё бўйлаб 26 июлда бўлиб ўтди.
Лойиҳа илк кунларида АҚШда 205 миллион доллар, бутун дунё бўйлаб эса 438,3 миллион доллар йиғди. Бундан ташқари, супер қаҳрамонларни ижро этган юлдузлар — Райан Рейнолдс ва Ҳью Жекман Гиннес рекордлари китобига киритилди. Шунингдек, Блейд ролини ижро этган Уэсли Снайпс ҳам иккита рекордни янгилади.
Режиссёр Шон Леви томонидан суратга олинган “Дедпул ва Росомаха”да носталгия ҳисларини уйғотадиган кўплаб супер қаҳрамон роллари мавжуд: Олов-одам (Крис Эванс), Лора Кинни (Дафне Кин), Блейд (Уэсли Снайпс), Электра (Женнифер Гарнер), Гамбит (Чаннинг Татум).
Аввалроқ фильмда кичик Роберт Дауни ва Николас Кейж ҳам суратга тушиши мумкинлиги ма`лум бўлган эди. Гарчи актёрлар ушбу лойиҳада иштирок этишга розилик бермаган бўлса-да, “Дедпул ва Росомаха” комедиясига яна бир ноодатий эпизодик образ ҳам қўшилди: фильмда Британиянинг энг хунук ити танлови ғолиби Дедпулнинг тўрт оёқли дўстини гавдалантирди.
Изоҳ (0)