Ўзбекистонлик шифокорлар Словенияга юқори маошли ўринларга ишга таклиф қилинмоқда. Бу ҳақда Миграция агентлиги хабар берди.
Унга кўра, Миграция агентлиги ҳамда Словениянинг “Здравствени дом толмин” соғлиқни сақлаш муассасаси томонидан шифокорлар учун иш таклиф этилмоқда. Йўналишлар:
- умумий (оилавий) амалиёт шифокори
- шошилинч тиббий ёрдам
- педиатрия (болалар шифокори)
- гинекология.
Номзодларга қўйиладиган талаблар:
- “Тиббиёт” факультетининг бакалавриат босқичини тамомлаган бўлиш;
- Тиббиёт ва диагностика бўйича етарли билимга эга бўлиш;
- Жамоада ишлаш ва беморлар билан мулоқот қилиш кўникмаси;
- Суҳбат инглиз тилида ўтказилади;
- Ишга қабул қилингач, словен тилини ўрганиш талаб этилади.
Умумий талаблар:
- тиббий маълумот ва йўналиш бўйича диплом;
- инглиз тилида эркин мулоқот қила олиш;
- судланмаганлик;
- Ўзбекистон ҳудудидан чиқишга тақиқ бўлмаслиги.
Иш берувчи томонидан тақдим этилади:
- ойлик иш ҳақи — 2 500 евро;
- тиббий суғурта;
- овқатланиш ва транспорт харажатлари қоплаб берилади;
- йиллик меҳнат таътил бонуси;
- малака ошириш имкониятлари (пуллик тренинглар);
- иш стажига қараб қўшимча бонуслар.
Номзодлар инглиз ёки словен тилида тайёрланган CV топшириши керак. CV’да қуйидагилар кўрсатилиши лозим:
- ишлаган муассаса номи;
- фаолият юритган йиллар (масалан, 2019–2022);
- эгаллаган лавозим ва бажарган вазифалар.
Қайд этилишича, рўйхатдан ўтиш ишга қабул қилинишни кафолатламайди. Номзодлар иш берувчидан талабнома келганда танлов асосида сараланади.
Миграция агентлиги ўзбекистонлик 1500 дан ортиқ фуқаро Словенияда иш топиши мумкинлигини маълум қилганди.
2025 йил ҳолатига кўра, Словения рекорд даражадаги паст ишсизлик (тахминан 3,2–3,5 фоиз) ва юқори бандлик даражасига эга. Бу ҳолат маҳаллий меҳнат бозорида бўшлиқларни келтириб чиқаряпти.
Қурилиш, соғлиқни сақлаш, меҳмонхона ва ресторанлар, ишлаб чиқариш, таълим ва ахборот технологиялари йўналишида ишчи кучи етишмовчилиги борлиги таъкидланган.
Ўзбекистон—Словения муносабатлари
Словения Ўзбекистон мустақиллигини 1991 йил 27 декабрда тан олган бўлиб, икки давлат ўртасида дипломатик муносабатлар 1995 йил 16 январда ўрнатилган. 2024 йил октябрь ойида Ойбек Шахавдинов Ўзбекистоннинг Словениядаги биринчи элчиси этиб тайинланди.
Сўнгги йилларда Ўзбекистон ва Словения ўртасидаги савдо-иқтисодий алоқалар ривожланмоқда. 2024 йилда икки томонлама савдо ҳажми 175 миллион доллардан ошди, бу 2023 йилга нисбатан 25 фоизга ўсишни англатади . 2025 йилнинг биринчи чорагида эса савдо ҳажми 127 миллион долларни ташкил этиб, ўтган йилнинг шу даврига нисбатан 47,8 фоизга ўсди.
Словения Европа Иттифоқи аъзоси сифатида Ўзбекистон учун Европа билан алоқаларни мустаҳкамлашда муҳим шерик ҳисобланади.
Ўзбекистонлик ҳамширалар АҚШга ишлаш учун юборилади
Бу ҳақда Миграция агентлиги директор ўринбосари Азимжон Ҳусанов ва New Future Succyess Academy халқаро ҳамшираларни тайёрлаш ўқув марказининг Ўзбекистондаги бошқарувчи менежери Фозилбек Хонхўжаев ўртасидаги учрашувда маълум қилинган. 2030 йилгача АҚШда 1 миллиондан ортиқ ҳамшираларга талаб мавжуд.
Ўзбекистонда 2018—2023 йилларда аҳоли даромадининг 16 фоизи мигрантлар улушига тўғри келган. Чет элларда ишлаётган юртдошлар ҳар йили Ўзбекистонга ўн икки-ўн беш миллиард доллар жўнатади.
Ўзбекистонлик ҳамширалар Қатарга ишга таклиф қилинмоқда
Жами иш ўрни 10 та, иш ҳақи ойига 2750 долларни ташкил этади.
Иш уч сменали тизимда амалга оширилиб, ҳафтасига 48 соат, 6 кунни ташки этади. Номзодлар учун шартлар: 18−50 ёш оралиғида бўлиш, тиббиёт соҳасида камида 2 йиллик иш стажига эга бўлиш ҳамда инглиз тилини мукаммал билиш.
Изоҳ (0)