Эрон АҚШдан “қасос” олиш сифатида 23 июнь куни Қатардаги Америка Қўшма Штатлари ҳарбий базасига ҳужум қилгани маълум. Баъзи таҳлилчиларнинг фикрича, Эроннинг “нисбатан чекланган” жавоби АҚШ билан кескинликни юмшатиш истагидан дарак берса-да, кўплаб давлатлар ҳужумни кескин қоралаган. Қуйида турли давлатлар томонидан эълон қилинган баъзи баёнотлар келтириб ўтилган.
АҚШ
АҚШ президенти Дональд Трамп Truth Social ижтимоий тармоғида шундай ёзди: “Эрон ядровий иншоотларни йўқ қилишимизга жуда заиф жавоб берди. Биз буни кутган эдик ва жуда самарали қаршилик кўрсатдик. 14 та ракета отилиб, улардан 13 таси уриб туширилган, 1 таси эса хавфли бўлмаган ҳудудга йўналтирилган эди. Шуни мамнуният билан маълум қиламанки, ҳеч бир америкалик жабрланмади ва деярли ҳеч қандай зарар кўрмади. Умид қиламанки, бошқа НАFRAТ бўлмайди. Мен Эронга эрта огоҳлантиргани учун миннатдорчилик билдирмоқчиман. Бу ҳеч кимнинг ҳаётига зарар етказмай, ҳеч ким жароҳатланмаслигига имкон берди. Эҳтимол, Эрон энди минтақада тинчлик ва тотувликни таъминлаши мумкин ва мен Исроилни ҳам шунга ундайман. Эътиборингиз учун ташаккур!”
Эрон
Эрон олий раҳнамоси Оятуллоҳ Али Хоманаий Х ижтимоий тармоғида пост қолдирди: “Биз ҳеч кимга зарар етказмадик. Ва биз ҳеч кимдан, ҳеч қандай шароитда ҳеч қандай тазйиқни қабул қилмаймиз. Биз ҳеч кимнинг тазйиқига бўйсунмаймиз. Бу Эрон халқининг тушунчасидир”.
Қатар
“Бош вазир маслаҳатчиси, Ташқи ишлар вазирлиги расмий вакили доктор Мажид бин Муҳаммад ал-Ансорий Қатар давлати Эрон инқилобий гвардияси томонидан Ал-Удайд авиабазасига уюштирилган ҳужумни кескин қоралашини билдирди. Буни Қатар давлати суверенитети, ҳаво ҳудуди, халқаро ҳуқуқ ва Бирлашган Миллатлар Ташкилоти низомини қўпол равишда бузиш деб ҳисоблади. У Қатар халқаро ҳуқуққа мувофиқ, ушбу сурбетларча тажовузнинг табиати ва кўламига мос тўғридан тўғри жавоб бериш ҳуқуқини ўзида сақлаб қолишини таъкидлади”, деди ҳукумат вакиллари.
Саудия Арабистони
“Саудия Арабистони Подшоҳлиги Эрон томонидан қардош Қатар давлатига қарши бошланган, халқаро ҳуқуқ ва яхши қўшничилик тамойилларини қўпол равишда бузадиган ва ҳар қандай шароитда оқлаб бўлмайдиган мутлақо номақбул тажовузни кескин қоралайди”, деб баёнот берган ҳукумат расмийлари.
Бирлашган Араб Амирликлари
“Бирлашган Араб Амирликлари Эрон инқилобий гвардиясининг қардош Қатар давлатидаги Ал-Удайд авиабазасини нишонга олишини Қатар суверенитети ва ҳаво ҳудудини қўпол равишда бузиш, халқаро ҳуқуқ ва БМТ низомини очиқдан очиқ бузиш деб ҳисоблаб, кескин қоралайди. БАА Қатар хавфсизлигига таҳдид соладиган, минтақа хавфсизлиги ва барқарорлигига путур етказадиган ҳар қандай ҳужумни қатъиян рад этади”, деб расмийлар фикр билдирган.
Баҳрайн
“Баҳрайн Қироллиги Эроннинг ҳудудга ҳужумидан сўнг биродар Қатар давлатини тўлиқ қўллаб-қувватлашини тасдиқлайди. Қироллик қардош Қатар давлатига биродарлик ва қон ришталари билан боғланган ва у билан тўлиқ бирдамлигини билдиради. Бу эса Кўрфаз араб давлатлари ҳамкорлик кенгаши мамлакатларининг ушбу нозик шароитда минтақа ўзини тийиш, кескинлашувга йўл қўймаслик ва барча низоларни тинч йўл билан ҳал қилиш учун зарур саъй-ҳаракатларни амалга оширишда бирдамлигини тасдиқлайди”, деб ҳодисага фикр билдирган давлат вакиллари.
Кувайт
“Кувайт давлати Эрон инқилобий гвардияси томонидан қардош Қатар давлатидаги Ал-Удайд авиабазасига уюштирилган ҳужумларни кескин қоралашини билдиради. Ушбу ҳужум Қатар суверенитети ва ҳаво ҳудудини, шунингдек, халқаро ҳуқуқ ва Бирлашган Миллатлар Ташкилоти низомини қўпол равишда бузиш ҳисобланади. Бу минтақадаги тинчлик, хавфсизлик ва барқарорликка таҳдид солувчи хавфли кескинлашувдир.
Кувайт қардош Қатар давлатидаги биродарларни, унинг раҳбарияти, ҳукумати ва халқини тўлиқ қўллаб-қувватлашини ҳамда унинг суверенитети, хавфсизлиги ва барқарорлигини сақлаб қолиш учун кўрилаётган барча чораларни, жумладан, ушбу очиқдан очиқ тажовузнинг кўламига мос равишда тўғридан тўғри жавоб бериш ҳуқуқини тўлиқ қўллаб-қувватлашини тасдиқлайди”, дея ҳисобот берди Кувайт ҳукумати.
Франция
Франция президенти Эммануэл Макрон баёнот бериб, шундай деди: “Франция Эрон томонидан зарба берилган Қатар билан бирдам. Мен мамлакат ҳокимияти ва минтақадаги ҳамкорларимиз билан яқин алоқадаман. Мен барча томонларни максимал даражада вазмин бўлишга, кескинликни юмшатишга ва музокаралар столига қайтишга чақираман. Бу бошбошдоқлик тугаши керак”.
Хитой
Хитой ташқи ишлар вазири Ван И 23 июнь куни АҚШнинг Эрон ядровий объектларига ҳужумлари “дунёда нотўғри тушунча ҳосил қилгани”ни билдирган.
“Томонлари вазиятни юмшатиш, мулоқот ҳамда музокараларга қайтиш учун чоралар кўриши керак”, деди Ван И.
Хитойнинг Бирлашган Миллатлар Ташкилотидаги элчиси Фу Конг шундай деб фикр билдирди: “Томонлар куч импулсини тийиб туриши, зиддиятларни кучайтириш ва оловга мой қуйишдан қочиши керак”.
Фаластин маъмурияти
Фаластин маъмурияти 23 июнь куни эълон қилган баёнотида Эроннинг Қатарга ракета ҳужумини қоралаб, буни Қатар суверенитетининг очиқдан очиқ бузилиши деб атаган. Ҳукумат Қатар ва унинг халқи билан бирдамлигини билдириб, Форс кўрфази давлатини қўллаб-қувватлашини яна бир бор тасдиқлаган.
Изоҳ (0)