Трамп маъмурияти март ойида адашиб Салвадорга юборилган Килмар Абрего Гарсияни бошқа мамлакатга депортация қилишга қарор қилди. Бу ҳақда CNN хабар берди.
Килмар Абрего Гарсияга суд томонидан 2019 йилда Салвадорга депортация қилинмаслик тўғрисида қарор чиқарилганди. Аммо 2025 йил 15 мартда хатолик сабаб у Салвадорга юборилганди. АҚШ Олий суди апрель ойида депортация хато экани ва унинг Штатларга қайтарилиши керак деган қарор чиқарган. Гарсияни 7 апрелга қадар қайтарилиши режалаштирилган эди, аммо Олий суд буни муддатсиз вақтга тўхтатиб турган.
АҚШ Ички хавфсизлик департаменти Абрего Гарсия иммиграция ҳибсхонасига қайтганидан кейин депортация жараёни бошланишини маълум қилган. Бу ҳақда Адлия департаменти 26 июнь куни бўлиб ўтган қисқа суд мажлисида маълум қилган. Аммо, депортация қилишнинг аниқ санани очиқланмаган.
“Бу жараён 30 сония, 30 кун ёки 30 ойда содир бўлиши мумкин экан-да?”, деб сўради Мериленд федерал округ суди судьяси Паула Хинис суд мажлисида.
Бу саволга адлия вазири Жонатан Гайн қуйидагича жавоб берди:
“Уни бошқа давлатга ҳозироқ депортация қилиш режалаштирилмаган”.
Ҳужжатсиз муҳожирнинг тақдири ҳали ҳам аниқ белгиланмаган. Ички хавфсизлик ва Адлия департаменти ҳозирда бу борада зиддиятда экани билдирилган. Абрего Гарсиянинг адвокатлари унинг Салвадордан бошқа номаълум давлатга юборилиши мумкинлигидан хавотирда. Бу тўғрисидаги қарор бугун, 27 июнь куни эълон қилиниши эҳтимоли бор.
Трамп маъмуриятининг Абрего Гарсияни Салвадорга депортация қилиши 2019 йилдаги иммиграция қонунини бузган. Шундай бўлса-да, буйруқ унинг бошқа мамлакатга депортация қилинишини истисно қилмайди.
Абрего Гарсия ҳозирда Теннесси штатида тергов изоляторида суд назорати остида сақланмоқда. Аммо у тез орада ушбу суднинг ваколатидан озод қилинади ва АҚШ Ички хавфсизлик департаментига топширилади.
“Ушбу судланувчи оғир жиноятларда, жумладан, болалар савдосида айбланган. Энди у мамлакатимизда эркинликда юрмайди”, деди Адлия вазирлиги матбуот котиби Чад Гилмартин.
Оқ уй ҳам Абрего Гарсияни судга беришни истаётганини очиқчасига таъкидлаган.
“Абрего Гарсия унга қўйилган ўта оғир айбловлар бўйича судга тортилиш учун Қўшма Штатларга қайтарилди. У содир этган жиноятлари учун тегишли жазони Америка қамоқхонасида ўтайди”, деди Оқ уй матбуот котиби ўринбосари Абигайл Жексон.
Изоҳ (0)