Ғазо секторидаги ҳарбий ҳаракатлар икки ҳафтадан кейин тўхташи мумкин. Бу ҳақда Israel Hayom нашри хабар берди.
Маълум қилинишича, АҚШнинг яқинда Эронга берган зарбаларидан сўнг президент Дональд Трамп Исроил бош вазири Биньямин Нетаньяху билан шошилинч музокаралар ўтказган. Мазкур музокараларда Ғазо секторидаги урушни тугатишга қарор қилингани айтилмоқда. Нашр хабар берган Ғазодаги тинчлик режаси қуйидагича:
- Ҳарбий ҳаракатлар икки ҳафта ичида тўхтатилиши керак. Ғазо устидан назорат тўртта араб давлати, жумладан, БАА ва Мисрга ўтади.
- ҲАМАС раҳбарияти минтақадан қувиб чиқарилади ва барча асирлар озод қилинади.
- Бир қатор давлатлар анклав ҳудудини тарк этишни истаган Ғазо аҳолисини қабул қилишга тайёрлигини билдирган.
- “Иброҳим келишувлари” кенгайтирилади — уларга Сурия ва Саудия Арабистони қўшилишни режалаштирмоқда, бу эса Яқин Шарқдаги сиёсий вазиятни сезиларли даражада ўзгартиради.
- Исроил фаластинликлар билан муносабатларни тартибга солишга тайёр, бироқ Фаластин мухториятида ислоҳотлар ўтказишни талаб қилмоқда.
- АҚШ Исроилнинг Ғарбий Соҳилдаги баъзи аҳоли пунктлари устидан қисман суверенитетини тан олишга тайёр.
Ҳозирча АҚШ ҳам, Исроил ҳам юқоридаги тинчлик режаси бўйича маълумотни расман тасдиқламаган. Аммо шуни таъкидлаш керакки, мазкур хабарни тақдим этган нашр анъанавий равишда Нетаньяхуга яқин манба ҳисобланади.
Изоҳ (0)