АҚШ президенти Дональд Трамп Исроилда порахўрлик ва фирибгарликда айбланаётган бош вазир Биньямин Нетаньяхуга қарши суд жараёнини тўхтатиш кераклигини та`кидлади. Оқ уй раҳбари бу фикрни Truth Social ижтимоий тармоғида билдирди.
“Ҳозиргина Бибини душанба куни судга чақиришганини билдим. Бу узоқ давом этаётган (у 2020 йил майдан бери бу “даҳшатли шоу”и бошдан кечирмоқда — мисли кўрилмаган! Исроилнинг амалдаги бош вазири биринчи марта суд олдида турибди.), сиёсий сабабларга асосланган, “сигаралар, Багз Банни қўғирчоқлари ва бошқа кўплаб адолатсиз айбловлар билан боғлиқ иш... Биби Нетаньяхуга қарши суд жараёни дарҳол бекор қилиниши ёки унга буюк қаҳрамон сифатида афв эълон қилиниши керак”, дея ёзди Трамп.
Америка етакчисининг таъкидлашича, у Нетаньяхудан кўра ўзи билан “кўпроқ уйғунликда” ишлай оладиган бошқа ҳеч кимни билмайди.
“Америка Қўшма Штатлари Исроилни қутқарди ва энди Америка Қўшма Штатлари Биби Нетаньяхуни қутқаради”, дея қўшимча қилган Оқ уй раҳбари.
2019 йил ноябрь ойида Исроилнинг собиқ бош прокурори Авихай Манделблит Нетаньяхуга порахўрлик, фирибгарлик ва ишончни суиистеъмол қилиш бўйича учта модда бўйича айб қўйилганини маълум қилди. Тергов жараёнига кўра, у буларни ҳукумат раҳбари ва алоқа вазири лавозимларида содир этган. Манделблитнинг фикрича, бу ишда сиёсат йўқ, фақат қонун устуворлиги мавжуд.
2020 йил май ойида ушбу ишлар бўйича суд жараёни бошланди. Баъзилар буни жуда секин кетаётганини танқид қилмоқда.
Нетаньяху ўзига нисбатан қўзғатилган жиноий ишлар бўйича судда кўрсатма берган Исроилнинг биринчи амалдаги бош вазири ҳисобланади.
Изоҳ (0)