АҚШ президенти Дональд Трамп интернет ва ижтимоий тармоқларда вақт сарфлаш ўрнига давлат раҳбари сифатидаги вазифаларини бажаришга эътибор қаратиши лозим. Бундай фикрни Бразилия етакчиси Луис Инасиу Лула да Сильва билдирди, дея хабар бермоқда G1 портали.
“АҚШ каби улкан давлат президенти мавжуд бўлган бу нотинч дунёда ўзи айтаётган сўзларини ўйлаб гапириши, интернетда камроқ вақт ўтказиши ва давлат раҳбари вазифаларини бажаришга кўпроқ вақт ажратиши керак”, деган Луис Инасиу Лула да Сильва.
Шунингдек, Бразилия президенти Трамп эркин савдони ривожлантириш, кўп томонлама муносабатларни мустаҳкамлаш ва тинчликка эришиш ҳақида кўпроқ қайғуриши лозимлигини таъкидлаган.
79 ёшли Бразилия президенти Трампни танқид қилиши биринчи марта эмас. Бундан аввал у Трампнинг бошқа мамлакатлар ички ишларига аралашиш ҳуқуқи йўқлигини айтган эди. Унинг фикрига кўра, Оқ уй раҳбари кўп қутбли дунёни ҳам шубҳа остига қўймоқда ва бутун дунёни умумий тартибсизликка олиб келиши мумкин.
Шунингдек, Лула да Сильва АҚШнинг ҳимоячилик савдо сиёсатини кескин қоралади ва Россия билан ҳамкорликни кучайтириш ниятида эканлигини билдирган.
Февраль ойида Трампнинг Ғазо секторидаги вазият ҳақидаги баёнотларига изоҳ берар экан, Лула да Сильва Америка етакчиси “дунёни бошқариш” учун эмас, балки Қўшма Штатларни бошқариш учун сайланганини эслатиб ўтган.
Изоҳ (0)