Эрон олий раҳнамоси Исроил-Эрон ўртасида ўт очишни тўхтатиш бўйича келишувга эришилганидан бери биринчи марта оммавий чиқиш қилди. Оятуллоҳ Али Хоманаий ўз нутқида АҚШ мамлакат ядровий объектларига берилган зарбалардан “ҳеч қандай ютуққа эришмаганини” таъкидлади. Бу ҳақда BBC хабар берди.
Олий раҳнамо ядровий объектларга қилинган ҳужумга жавобан Қатардаги Америка авиабазаси нишонга олинганинга изоҳ берди ва уни “оғир зарба” деб атади.
“Бу воқеа келажакда ҳам такрорланиши мумкин. Агар яна бирор ҳужум содир бўлса, душманлар оғир бадал тўлайди”, деди у.
Исроил 13 июнь куни Эронга уруш бошланганидан бери Хоманаий жамоатчилик эътиборидан четда бўлиб келганди. У бункерда яширингани ва алоқаларни чеклагани ҳақида хабарлар тарқалган. Хоманаий 26 июнь куни халққа видеомурожаат билан чиқиб, “агар Эронга яна ҳужум уюштирилса, АҚШнинг Яқин Шарқдаги базаларига кўпроқ зарба бериш” билан таҳдид қилганди. Шуниндек, у ўт очишни тўхтатиш кучга киргач, Исроил ҳамда АҚШ устидан ғалаба қозонилганини эълон қилган.
АҚШ мудофаа вазири Пит Хегсетга кўра, ҳаво ҳужумларида Эрон “ядро дастурига жиддий зарар етказган ва уни тиклашга йиллар кетади”. АҚШ президенти Дональд Трамп ҳам Эроннинг 3 та муҳим ядровий объектига берилган зарбалар уларни “бутунлай йўқ қилганини” таъкидлаган. Пентагонда 26 июнь куни бўлиб ўтган матбуот анжуманида Хегсет Эрон миссияси “тарихий муваффақият” бўлганини айтган.
Эрон Соғлиқни сақлаш вазирлиги 12 кунлик уруш давомида 610 киши ҳалок бўлганини, Исроил ҳукумати эса 28 киши ҳалок бўлганини билдирган.
Изоҳ (0)