АҚШ президенти Дональд Трамп яқинда Эрон ядро объектларига берилган авиазарбаларга изоҳ берар экан, АҚШнинг Иккинчи жаҳон уруши давридаги ҳаракатларига тарихий ўхшашлик келтирди. Бу ҳақда The New York Times хабар бермоқда.
АҚШ президенти Гаагада сўзлаган нутқида Эронга берилган зарбалар, унинг фикрича, бир пайтлар ядро зарбалари Япония билан урушни тугатгани каби Теҳрон таҳдидига барҳам берганини таъкидлаган.
“Бу зарба билан муваффақиятга эришмадикми? Бу зарба урушни тугатди. Улар буни амалга ошириш учун триллионлаб доллар сарфладилар ва эплаб бўлмадилар. Биз эса ҳозирда улар билан жуда яхши муносабатдамиз”, деди Трамп.
У АҚШнинг ҳаракатларини Иккинчи жаҳон уруши давридаги тарихий воқеалар билан солиштирган.
“Мен Хиросима мисолини келтирмоқчи эмасман, Нагасаки мисолини ҳам келтирмоқчи эмасман, лекин бу моҳиятан ўша урушни тугатган нарса эди. Бу унга, бу урушга чек қўйди. Агар биз шундай қилмаганимизда, улар ҳозир ҳам урушаётган бўларди”, деди АҚШ президенти.
Трампнинг фикрича, Эрон ҳозирда “бирор нарсани бойитиш”ни эмас, балки “тикланишни истаяпти”.
“Теҳроннинг ядро дастури Америка бомбардимонлари натижасида ўн йиллаб орқага сурилди”, дея таъкидлади Оқ уй раҳбари.
Шунингдек, президент эронликларнинг ўз объектларидан материалларни, жумладан, уранни олиб чиқиб кетишга вақти бўлганига ишонмаслигини айтган, чунки АҚШ “тез ҳаракат қилган”.
Оқ уй раҳбари агар Теҳрон уранни бойитиш дастурини тикласа, АҚШ қўшинлари янги зарба беришини таъкидлаган.
Маълумот учун, 1945 йил августда америкалик учувчилар Япониянинг Хиросима ва Нагасаки шаҳарларига атом бомбасини ташлади. Атом портлаши ва унинг оқибатларидан Хиросимада 350 минг аҳолидан 140 минг киши, Нагасакида 74 минг киши ҳалок бўлди. Атом бомбаси қурбонларининг аксарияти тинч аҳоли эди. Фожиали воқеаларнинг йиллигида — 6 ва 9 август кунлари Хиросима ва Нагасакида ҳар йили “Тинчлик маросимлари” ўтказилади.
Изоҳ (0)