АҚШ Молия вазирлиги 25 июнь куни Мексиканинг 3 та — CIBanco, Intercam Banco ва Vector Casa de Bolsa банкларига санкция жорий этди. Бу ҳақда Al Jazeera хабар берди.
Банклар синтетик фентанил гиёҳванд моддасининг трансчегаравий савдосида иштирок этгани айтилмоқда. Хусусан, улар Мексикада жойлашган картеллар номидан миллионлаб доллар ноқонуний маблағларни қонунийлаштириш ва фентанил ишлаб чиқариш учун зарур бўлган кимёвий моддаларни сотиб олиш тўловларини осонлаштиришда айбланган.
Санкциялар АҚШ президенти Дональд Трамп маъмуриятининг Лотин Америкаси тўдалари, жиноий тармоқ ва гиёҳванд моддалар савдогарларига қарши ҳаракатининг навбатдаги қисми ҳисобланади. Трамп бир нечта шундай гуруҳларни “хорижий террористик ташкилотлар” деб атаб, Мексика ҳукуматига чегара орқали “жиноий қатновлар”ни камайтириш учун тарифлар жорий этган эди.
Ғазначилик департаменти баёнотида айтилишича, банкларга “Фентанил санкциялари тўғрисидаги қонун” ва “FEND Off Фентанил тўғрисидаги қонун”га мувофиқ санкция белгиланган. Унга кўра, санкцияланган Мексика ва АҚШ банклари ўртасидаги пул ўтказмалари блокланади.
АҚШ молия вазири Скотт Бессент ўз баёнотида банкларни “сон-саноқсиз америкаликларнинг заҳарланишига имкон яратишда” айблаган. Аммо Мексика ҳукумати бу санкция киритилишига асос йўқлигини таъкидлаган.
“Агар бизга ушбу учта молия институтининг ноқонуний фаолиятини исботловчи ишончли маълумотлар тақдим этилса, биз қонун доирасида ҳаракат қиламиз”, дейилади Мексика Молия вазирлиги хабарида.
Изоҳ (0)