АҚШ президенти Дональд Трамп Шимолий Атлантика альянси давлатлари раҳбарлари билан ёпиқ учрашувда Украинадаги вазият назоратдан чиқиб кетгани ва шу боис фаол чоралар кўриш зарурлиги ҳақидаги фикрини билдирди. Бу ҳақда Bloomberg манбаларига асосланиб хабар бермоқда.
“Украина президенти Владимир Зеленский билан учрашувга иштиёқи йўқлигига қарамай, Трамп альянс раҳбарлари билан ёпиқ учрашувда Украина масаласида нимадир қилиш кераклигини айтди, чунки вазият “бутунлай назоратдан чиқиб кетган”, деди агентликка номи ошкор этилмаслик шарти билан суҳбатдош.
Шу билан бирга, у Оқ уй раҳбари “фаол чоралар” деганда нимани назарда тутганини аниқлаштирмаган. Бироқ Америка етакчисининг сўзларини “АҚШнинг Украинадаги можарони ҳал этишда фаолроқ иштирок этишга тайёрлигининг ижобий белгиси” сифатида баҳолаган.
Бундан олдин Трамп Зеленский “бўлмаслиги керак бўлган" жуда мураккаб вазиятда эканини айтган эди. Шунингдек, у украиналик сиёсатдонни яхши йигит деб атаган.
Украинанинг собиқ бош вазири Николай Азаров АҚШ аллақачон Владимир Зеленскийни ҳисобдан чиқариб, уни ҳокимиятдан четлатиш бўйича жиддий ишларни бошлаб юборганини билдирганди.
Изоҳ (0)