АҚШ президенти Дональд Трамп рус ҳамкасби Владимир Путиннинг ҳудудий даъволари Украина чегарасидан ташқарига чиқиши мумкинлигини истисно этмади. Бу ҳақда у НАТО саммити доирасида ўтказилган матбуот анжуманида маълум қилди.
Трампга Путиннинг ҳудудий амбициялари Украинадан ташқарига ҳам ёйилиши мумкинлиги ҳақидаги савол берилди. У “Менимча, бу эҳтимолдан холи эмас”, дея жавоб қайтарди.
Шунингдек, Трамп Путин урушдан чиқиш ва келишувга эришишни хоҳлаётганига ишонч билдирди. У яқинда Путин унга қўнғироқ қилиб Эрон масаласида ёрдам таклиф қилгани, аммо Трамп ундан кўра Россия билан боғлиқ масалаларда ёрдам беришини афзал кўрганини айтди.
Менимча, у боши берк кўчага кириб қолган. Тўғриси, мен ҳайратдаман. Буни осон ҳал қиламиз, деб ўйлагандим, деди Трамп.
Трамп президентлик лавозимига қайтганидан буён беш ой ичида Украинадаги урушни тугатиш бўйича сайловолди ваъдасини нима учун бажармаётгани ҳақидаги саволга жавоб берди. Унга кўра, Путин “жуда мураккаб шахс бўлиб чиққан”, Украина президенти Владимир Зеленский билан ҳам “муаммолар юзага келган”. Трамп рус ҳамкасби билан яна гаплашмоқчи эканини қўшимча қилди, аммо қачонлигини аниқлаштирмади.
Зеленский билан учрашув
Трамп 25 июнь куни НАТОнинг Гаагадаги саммитидан сўнг Украина президенти Владимир Зеленский билан учрашди. Трампнинг айтишича, улар Россия ва Украина ўртасида ўт очишни тўхтатиш масаласини муҳокама қилмаган. Фақат вазият қандайлигини билган.
Учрашувдан шуни англадимки, Зеленский урушнинг тугашини истайди. Мен эса Путин билан гаплашишим керак. Уни якунлай оламизми – кўрамиз. Ўтган ҳафтада қарийб етти минг украиналик ва россиялик ҳарбий ҳалок бўлгани ҳақиқатан даҳшат, деган Трамп.
Зеленский эса Трамп билан Украина шаҳарларини ҳимоя қилиш учун Патриот ҳаво мудофаа тизимларини харид қилиш ва дронларни биргаликда ишлаб чиқариш имкониятини муҳокама қилганини билдирган. Шунингдек, у Трампга Истанбулда Россия делегацияси билан бўлиб ўтган музокаралар, асирлар ва ҳалок бўлганлар алмашинуви ҳақида маълумот берган.
Биз жанг майдонидаги вазиятни муҳокама қилдик. Путин аниқ ғалаба қозонмайди. Президентга ерда рўй бераётган воқеалар ҳақида фактларни тақдим этдим, деган Зеленский.
Путин НАТОга ҳужум қилиши мумкин
Ғарб ҳарбийлари ва сиёсатчилари мунтазам равишда Путин НАТОга қарши ҳужум тайёрлаётган бўлиши мумкинлиги ҳақида огоҳлантириб келмоқда. Уларнинг тахминича, бу 3–5 йил ичида содир бўлиши мумкин, нишон эса Латвия, Литва ёки Эстония бўлади.
Путин аллақачон ҳарбий харажатларни ялпи ички маҳсулотнинг 7 фоизигача етказган. Ҳозирда бу харажатлар давлат бюджетининг учдан бир қисмидан кўпроғини ташкил этади. Бундан ташқари, Ленинград ҳарбий округида, Финляндия ва Болтиқбўйи мамлакатлари билан чегараларда ҳарбий базалар, қурол-яроғ омборлари, ҳамда ўн минглаб ҳарбийларни бошқариш учун штаблар барпо этилмоқда.
Изоҳ (0)