Netanyaxuga nisbatan uchta jinoiy ish bo‘yicha ayblov e’lon qilingan. Uning o‘zi ushbu harakatni siyosiy fitna deb atadi

Isroil bosh vaziri Binyamin Netanyaxuga nisbatan uchta jinoiy ish bo‘yicha ayblov e’lon qilindi. Bu haqda mamlakat adliya vazirligi bayonotiga asoslanib Times of Israel xabar berdi.

Isroil bosh prokurori Avixay Mandelblit Quddus shahridagi adliya vazirligi binosida qilgan chiqishida Netanyaxu poraxo‘rlik, ishonchi suiiste’mol qilish va firibgarlik jinoyatini sodir etganlikda gumon qilinayotganini bildirgan.

The Jerusalem Post gazetasining yozishicha, Mandelblit Knessetdan Netanyaxudan immunitetni olib tashlashni so‘ragan va ushbu jarayon 30 kun davom etadi. Nashr deputatlarda immunitetni bekor qilish tezroq amalga oshishi, ammo Isroil bosh vaziri jarayonni sekinlashtirishi mumkinligini qayd etgan.

Isroil OAVlari Mandelbit va uning jamoasi korrupsiya bo‘yicha tergovlar natijalarini mamlakatda uchinchi bor o‘tkazilishi kutilayotgan saylovlardan ilgari e’lon qilish uchun ularni tezkorlik bilan olib borgani haqida ma’lumot bergan.

Agar Netanyaxuning poraxo‘rligi isbotlansa, u bosh vazir lavozimidagi vakolatlarini bajara olmaydi. Biroq jinoiy javobgarlik uning saylovlar vaqtida yana o‘z nomzodini qo‘yishi va o‘z lavozimi uchun kurashishi mumkin.

4000 deb nomlangan jinoyat ishi bo‘yicha Netanyaxu “Bezek” telekommunikatsiya kompaniyasi rahbari Shaul Yelovichga imtiyozlar taqdim etgan va evaziga tashkilot saytida bosh vazir haqida ijobiy materiallar e’lon qilingan. Bu uchta jinoiy ish orasida eng jiddiysi deb baholanmoqda.

2000 jinoiy ishi bo‘yicha Netanyaxu “Yediot axronot” gazetasi egasi Arnon Mozes bilan til biriktirib, nashr raqobatchisida chiqqan tanqidiy materiallarga javoban bosh vazir haqida ijobiy maqolalar chop etishni tashkil qilgan.

Isroil bosh vaziri Binyamin Netanyaxu ushbu ayblovlar siyosiy harakat ekani va bundan ko‘zlangan maqsad uni lavozimdan chetlatish ekanligini bildirdi.

Netanyaxu “jodugarlarning siyosiy ovi qurboni” bo‘lganini qayd etdi va isroilliklarni o‘ziga nisbatan jinoiy ish ochganlarni ham tergovga jalb qilishga chaqirdi.

“Huquq-tartibot tizimidagi ishlarni ko‘zi ojiz odamgina payqamasligi mumkin. Menga nisbatan tergov ishlarini boshlaganlarning hammasiga qarshi tekshiruv ishlari o‘tkazilishi kerak”, — deydi Isroil bosh vaziri.