Эрон Натанз, Исфаҳон ҳамда Фордо ядровий объектларини АҚШ ҳужумидан олдин эвакуация қилган. Бу ҳақда Эрон давлат телерадиокомпанияси IRIB хабар берди.
Уларнинг орасида Фордо алоҳида аҳамиятга эга. Боиси объект 60-100 метр чуқурликда барпо этилган бўлиб, уранни бойитиш мақсадларида фойдаланилган. Эрон 2006 йилда қурилган махфий иншоот учун бир неча миллиард доллар сарфлагани айтилади. Иншоот мамлакатнинг маънавий пойтахти — Қум шаҳридан атиги 30 километр масофада жойлашган. У ерда IR-1 ва IR-6 центрифугалари фаолият кўрсатган.
Reuters нашрининг ўзи билан суҳбатлашган Эрон мулозимига таяниб хабар беришича, Фордо объектида сақланаётган бойитилган уран ҳужум олдидан номаълум нуқтага кўчирилган. Персонал эса минимум даражага туширилган. Сунъий йўлдошдан олинган тасвирлар АҚШ зарбасидан икки кун олдин чиндан ҳам иншоот яқинида ноодатий фаоллик кузатилганини кўрсатади.
Барчаси қандай бошланди?
Исроилнинг Эрон ҳарбий иерархияси ҳамда ядро дастури етакчиларини нишонга олган амалиётлари билан бошланган можаро ҳар икки томон учун ҳам талафотлар келтирди. Яҳудий давлати Натанз, Исфаҳон ва бошқа ядровий объектларни нишонга олган бўлса-да, Фордо улар учун етиб бўлмаслигича қолаётган эди. Шу боис ҳам Исроил бунга қодир салоҳиятга эга Қўшма Штатлар томон юзланди.
АҚШ президенти можарога аралашиш юзасидан бир қарорга келиши учун икки ҳафта вақт кетишини айтган бўлса-да, бугун тонгда Эронга кутилмаган зарбалар берилди. Ҳужум амалиётида 6 та B-2 Spirit стратегик бомбардимончилари ишга солингани, улар томонидан 12 та GBU-57 “бункер тешувчи” бомбалари қўллангани ҳақида хабар берилди. Талафотлар ҳақида визуал далил йўқ бўлса-да, Оқ уй объект бутунлай вайрон этилганини даъво қилмоқда.
Изоҳ (0)