Беларусь президенти Александр Лукашенко Германия канцлери Ангела Меркель билан телефон суҳбати чоғида қочқинларнинг катта қисмини ўз ватанига қайтаришга кўмаклашишга ваъда берди. Бироқ бунинг учун Европа Иттифоқи Польша билан чегара яқинидаги лагерда бўлиб турган 2000 киши учун гуманитар йўлак очиши керак, дея хабар берди «Коммерсантъ» Беларусь президенти матбуот котиби Наталя Эйсмонтга таяниб.
Ангела Меркель гўёки, Германия учун бундай йўлак очиш бўйича Европа Иттифоқи расмийлари билан музокара олиб боришга ваъда берган. Эйсмонтнинг сўзларига кўра, Лукашенко таклиф қилган механизмга мувофиқ ҳолда Европа Иттифоқи лагердаги 2000 қочқин учун гуманитар йўлак яратмоқда. «Қолган 5 минг кишини ўз ватанларига қайтаришга (имкон қадар ва агар улар хоҳласа) ёрдам бериш мажбуриятини оламиз. Ангела Меркель эса келишувларга кўра, Европа Иттифоқи билан, жумладан, Германийга гуманитар йўлак ташкил этиш бўйича музокаралар олиб боради», — дея қўшимча қилди у.
Унинг таъкидлашича, Минск ўз мажбуриятларини охиригача бажаради. «Ҳа, афсуски, фақат 400 га яқин қочқин ўз ватанига қайтишга рози бўлди. Аниқроқ айтганда, бугун учиб кетган самолётда 374 нафар йўловчи бор эди, уларнинг аксарияти Ироқ фуқаролари», — деди Эйсмонт хоним.
«Умумий ҳисобда, бугун республика ҳудудида 7 мингга яқин қочқин бор. Улардан 2 мингга яқини чегарадаги муҳожирлар лагерида. Мавжуд маълумотларга кўра, яна 200 дан 500 нафаргача бўлган кишилар ҳам чегарада, лекин улар бошқа нуқталарда. Бу қочқинлар аллақачон Польшага кириб борган, польшаликлар эса уларни куч билан ҳайдаб чиқаришга уринган», — деди Наталя Эйсмонт.Унинг сўзларига кўра, Беларусдаги қолган қочқинлар Европа Иттифоқидан, биринчи навбатда, Германиядан бошпана берилишини талаб қилмоқда. Эйсмонт, шунингдек, Европа Иттифоқи муҳожирлар билан инқирозни ҳал қилиш бўйича келишувни бажармаётганини таъкидлади. «Биз ўз ваъдаларимизга вафо қиляпмиз, бироқ Европа Иттифоқи томонидан бирорта ҳам мажбурият бажарилмаган», — деди у. Хусусан, Европа Иттифоқи Лукашенко ва Меркель телефон суҳбатида келишиб олган экспертлар даражасидаги музокараларни ҳали ҳам бошламаган.
17 ноябрь куни Александр Лукашенко ва Ангела Меркель миграция инқирози юзасидан бир ҳафта ичида иккинчи марта телефон орқали мулоқот қилган. Минск томонлар муаммони Беларусь ва Европа Иттифоқи даражасида ҳал қилишга келишиб олганини даъво қилмоқда. Берлин хабарига кўра, Германия канцлери вазифасини бажарувчи Меркель муҳожирларга гуманитар ёрдам кўрсатиш тарафдори эканини айтган.
18 ноябрь куни Европа Иттифоқи Польша ва бошқа давлатлар билан чегарадаги муҳожирлар оқимига оид вазият юзасидан Беларусь билан кенг кўламли музокаралар ўтказиш имкониятини истисно қилди.
«Лукашенко режими билан музокаралар масаласи кун тартибида йўқ», — деди Европа комиссияси вакили Эрик Мамер брифингда. Унинг сўзларига кўра, Брюсселнинг эътибори ҳозир Минск билан бундай алоқаларга эмас, муҳожирларга ёрдам бериш ва уларни уйларига олиб кетишга қаратилган.
Шу билан бирга, Мамер Беларусь томони билан алоқалар ўрнатиш эҳтимоли мавжудлиги, аммо фақат бу техник масалаларда бўлишини айтди. «Биз Бирлашган Миллатлар Ташкилоти тузилмалари, хусусан, БМТнинг Қочқинлар бўйича агентлиги, Халқаро миграция ташкилоти ва Беларусь томони билан чегарадаги одамларни ватанига қайтаришга ёрдам бериш бўйича техник музокаралар олиб борамиз. Бу музокаралардаги асосий мавзу бўлади, шунингдек, албатта, чегарадаги одамларга ёрдам кўрсатишни осонлаштиради», — дея қўшимча қилди Иттифоқ вакили.
Мавзуга доир:
- Лукашенко чегарадаги мигрантлар учун бошпана ташкиллаштириш бўйича топшириқ берди. Улар логистика марказига жойлаштирилган (фото)
- Миграция инқирозида Лукашенконинг айби йўқ. Аммо у Европага кетадиган Россия газини узиб қўймаслиги керак. Путин ҳафтанинг энг муҳим мавзуси ҳақида фикр билдирди
- Европада қочоқлар билан боғлиқ вазият учинчи жаҳон урушига олиб келиши мумкинлиги айтилмоқда
Изоҳ (0)