Россия ва Украина ўртасида 24 август куни ҳар бир тарафдан 146 нафар маҳбус алмашилди. Бу ҳақда The Moscow Times хабар берди.
Россия Мудофаа вазирлиги баёнотига кўра, Украинада ушлаб турилган 146 нафар россиялик ҳарбий хизматчи озод этилган. Бунинг эвазига 146 нафар Украина Қуролли кучлари аскари ҳам Украинага қайтарилган.
“Улар 2022/23 йилларда босқинчилар томонидан ноқонуний равишда ҳибсга олинган эди”, дейилади рус ТИВ баёнотда.
Россия томони, шунингдек, Курск вилоятидан бўлган, Киев томонидан ноқонуний ҳибсга олинган 8 нафар россиялик фуқаро ҳам алмашув доирасида қайтарилганини билдирган. Украина эса бу борада аниқ рақамларни тасдиқламаган, аммо озод қилинганлар орасида 2 нафар украиналик журналист — Дмитро Хилюк ва Марк Калиуш борлиги билдирилган. Мамлакат президенти Владимир Зеленский ҳам бу воқеага муносабат билдириб, ижтимоий тармоқларда қуйидагича пост қолдирган:
“Хилюк 2022 йил мартида Киев вилоятида ўғирлаб кетилган эди. Ниҳоят, у уйида — Украинада”.
Чегара билмас мухбирлар (РСФ) ташкилоти асирларнинг озод этилишини олқишлаб, улар журналистик фаолияти сабаб нишонга олинганини таъкидлаган.
“РСФ уларни ўғирлаб, қамоқда қийноққа солган шахсларни аниқлашни ва жавобгарликка тортишни талаб қилади. Ҳозирда Кремль қўлида сақланаётган 26 нафар украиналик ОАВ ходими ҳам озод қилиниши шарт”, деди ташкилот вакиллари.
Шунингдек, Украинанинг Херсон шаҳри собиқ мери Владимир Миколаенко ҳам озод этилгани айтилмоқда. Бу ҳақда Зеленскийнинг ёрдамчиси Андрий Ермак ўзининг Х тармоғидаги саҳифасида хабар берган.
“Миколаенко қарийб 3 йил асирликда бўлган. У 2022 йилда алмашув рўйхатига киритилган эди, бироқ ўша вақтда ўзи билан камерада сақланаётган оғир хасталикка чалинган маҳбус фойдасига алмашувдан ихтиёрий равишда воз кечган”, деди Ермак.
Россия ва Украина ўртасида сўнгги марта 23 июль куни асирлар алмашинувининг тўққизинчи раунди бўлиб ўтганди. Унда ҳар икки томонда 250 дан ортиқ асирлар алмашилган. Ушбу ташаббусга 2 июнь куни Истанбулда бўлиб ўтган тинчлик музокараларида келишиб олинган.
Изоҳ (0)