O‘zbekiston TIV Moskvadagi reydda kuch ishlatar tuzilmalarning migrantlarga nisbatan harakatlari yuzasidan Rossiyaga nota yuborgandi. Rossiya TIV axborot xizmati rahbari Mariya Zaxarova ushbu notadagi ma’lumotlar diqqat bilan o‘rganilayotganini ma’lum qildi.
“Rossiya tomoni O‘zbekiston notasidagi ma’lumotlarni diqqat bilan ko‘rib chiqmoqda va o‘zbekistonlik hamkorlarning tegishli so‘rovi vakolatli organlarga yetkaziladi. Olingan obyektiv ma’lumotlar belgilangan tartibda Toshkentga yuboriladi”, deya uning so‘zlarini keltirmoqda “TASS”.
U huquq-tartibot va boshqa xizmatlar orqali to‘g‘ridan-to‘g‘ri aloqa kanallari mavjudligini, ittifoqchilar o‘rtasidagi an’anaga ko‘ra, suhbat samimiy bo‘lib, har qanday signal sinchkovlik bilan ko‘rib chiqilishini bildirdi.
“O‘zbekiston bilan mustahkam ittifoqchilik va har tomonlama strategik sheriklik munosabatlari mavjudligini va ikki tomonlama munosabatlarimizning barcha mavzulariga shu nuqtai nazardan yondashishimizni ta’kidlamoqchimiz”, deya qo‘shimcha qilgan Zaxarova.
8-iyun kuni Moskvaning Sokolniki tumanida o‘tkazilgan tekshiruv tadbirlari chog‘ida Rossiya huquqni muhofaza qiluvchi organlari (OMON) tomonidan ushbu davlatda vaqtincha mehnat faoliyatini olib borayotgan xorij fuqarolariga nisbatan jismoniy kuch qo‘llanilgandi. Migratsiya agentligining Rossiyadagi vakolatxonasi jabrlanganlar orasida O‘zbekiston fuqarolari bo‘lsa, jumladan, ularga tan jarohatlari yetkazilgan, huquqlari buzilgan yoki boshqa muammolarga duch kelgan bo‘lsa, murojaat qilishni so‘ragandi.
O‘zbekiston TIV tomonidan yuborilgan notada Rossiya TIVdan ushbu holatga izoh berish hamda inson huquqlari yaqqol buzilganligi aks etganligi, bu esa qabul qilib bo‘lmas holatligi ta’kidlanib, kuch ishlatar tashkilot vakillarining harakatlariga huquqiy baho berish so‘ralgan.
2025-yil aprel oyi oxirlarida Rossiyada o‘zbek migrantlari huquqlariga rioya etilishi nazorati kuchaytirilishi ma’lum qilingandi. Ikki davlat Bosh prokuraturalari migrantlarning huquqlariga rioya etilishi ustidan nazorat va kuzatuvni kuchaytirish majburiyatini olgandi.
Izoh (0)