АҚШ президенти Дональд Трамп Лос Анжелесда бўлаётган норозилик намойишлари фонида Калифорния губернатори Гевин Ньюсомни вазиятни бошқара олмаётганликда айблади. Бу ҳақда у ўзининг Truth Social ижтимоий тармоқдаги саҳифасида ёзди.
“Лос Анжелесда сўнгги икки кеча тинч ўтди. Буюк Миллий гвардиямиз денгиз пиёдалари ёрдамида Лос Анжелес полициясига ўз вазифасини самарали бажариш имконини яратди. Улар биргаликда яхши ишладилар, бироқ ҳарбийларсиз Лос Анжелес биз узоқ йиллардан бери кўрмаган жиноят ўчоғига айланарди. Губернатор Гейвен Ньюскам вазиятни бутунлай назорат қила олмай қолди. Уни қутқарганингиз учун РАҲМАТ айтиши керак”, дея ёзди Трамп.
Шу билан бирга, президент Ньюсомнинг фамилиясини ҳақоратли тарзда бузиб кўрсатди ва уни ҳуқуқ-тартибот идораларига миннатдорлик билдириш ўрнига ўз лаёқатсизлигини оқлашга уринаётгани учун қаттиқ танқид қилди.
6 июнь куни Лос Анжелесда ноқонуний муҳожирларни оммавий ҳибсга олиш бошланди, 7 июнь куни кечқурунга келиб миграция қонунчилигини бузганликда айбланиб, камида 44 киши қамоққа олинди. Ҳуқуқни муҳофаза қилиш органларининг бу ҳаракатларига жавобан шаҳарда тартибсизликларга айланиб кетган намойишлар бошланди. АҚШ президенти Дональд Трамп Калифорния губернатори Гевин Ньюсомни четлаб ўтиб, тартибсизликларни бостириш учун Лос Анжелесга Миллий гвардия аскарларини юборишни буюрди. Шундан сўнг, Ньюсом Трамп ва Пентагон раҳбари Пит Хегсетга қарши судга мурожаат қилди. Губернатор Миллий гвардия аскарларини Лос Анжелесга юбориш тўғрисидаги қарорни ғайриқонуний деб топишни сўрамоқда.
Изоҳ (0)