Россияда рус тилини билмаган мигрант болаларни мактабларга қабул қилиш тақиқланади. Россия Давлат думаси раиси Вячеслав Володин миграция сиёсатини ўзгартириш бўйича яна бир қонун лойиҳаси тайёрланаётганини айтди. Бу ҳақда “Интерфакс” хабар берди.
Биз ҳуқуқни муҳофаза қилиш соҳасидаги зарур қадамларни таҳлил қилиб, ечимини кутаётган муаммоли масалаларга эътибор қаратдик. Қарор доирасида ҳукуматга меҳнат миграцияси ҳамда мигрантлар билан бирга келаётган оилалар бўйича таклифларимизни йўллаймиз, деди Володин.
Лойиҳа мигрант болаларни мактабга қабул қилишда уларнинг Россияда қонуний бўлишини ва уларнинг рус тилини билиш даражасини синовдан ўтказишни назарда тутади. Қарор лойиҳасини 20 ноябрь куни кўриб чиқиш режалаштирилмоқда.
Мигрантларнинг рус тилини ўрганиши бўйича чақириқлар
Россия президенти Владимир Путин 5 ноябрь куни рус тилини кам ёки умуман билмайдиган хорижлик болалар билан ишлаш алгоритмини ишлаб чиқишга чақирди. У рус тилини билишга қўйиладиган талаб даражаларини аниқлаш ва мустаҳкамлашни топширди.
Июль ойида “Рособрнадзор” раҳбари Анзор Музаев рус тилини билмайдиган мигрант болаларни мактабга қабул қилмасликни таклиф қилганди. У чет эл фуқаролари оилалари билан Россияга кўчиб келган бўлса ва бу ерда яшашни режалаштираётган бўлса, уларнинг фарзандлари рус тилини ўрганиши кераклигини айтган.
Июнь ойида Инсон ҳуқуқлари бўйича кенгаш раҳбари Валерий Фадеев мактабда “рус тилини билмайдиган бирорта ҳам бола рўйхатда турмаслиги керак”лигини айтган.
Изоҳ (0)