Франция АҚШнинг Париждаги элчиси Чарльз Кушнерни 25 август куни Ташқи ишлар вазирлигига чақириш ниятида. Бунга элчининг Францияда антисемитизмнинг кучайишига қарши чоралар кўрилмаётгани ҳақидаги баёнотлари сабаб қилиб кўрсатилмоқда. Бу ҳақда BBC хабар берди.
Кушнер — яҳудий миллатига мансуб бўлиб, АҚШ президенти Дональд Трампнинг қудаси ҳамдир (Иванка Трампнинг қайнотаси). У ўз мурожаатини Wалл Стреет Жоурнал газетасида эълон қилинган очиқ мактуб орқали Франция президенти Эммануэл Макронга йўллаган. Унда элчи Ғазо уруши бошланганидан бери Францияда яҳудийларга нисбатан нафрат кучаяётганини таъкидлаган.
“Франция бу сўнгги айбловларни қатъиян рад этади. Уларни ҳеч қанақасига қабул қилиб бўлмайди”, дейилади француз ТИВ баёнотида.
Кушнер ўз мактубида Макронни Исроилга нисбатан танқидларини юмшатишга чақирган ва Францияда антисемитизм содир бўлаётганига мисоллар келтирган:
“Францияда ҳар куни яҳудийлар кўчада таҳқирланади. Уларга тегишли дўконлар эса вандализм нишонига айланади. Ҳатто француз Ички ишлар вазирлиги ҳам мактабгача таълим муассасаларида антисемитик ҳолатлар қайд этилганини билдирган”.
Шунингдек, элчи Макрон ва бошқа француз раҳбарлари билан биргаликда бу муаммога қарши “жиддий режа ишлаб чиқишга” тайёрлигини билдирган. Франция Ташқи ишлар вазирлиги эса Вена конвенциясига (1961 йил) таяниб, хорижий дипломатларнинг мамлакат ички ишларига аралашиши мумкин эмаслигини таъкидлаган.
Кушнернинг бу баёноти Исроил бош вазири Бенямин Нетаньяхунинг ўтган ҳафта Макронга ёзган мактубидаги фикрларни такрорлайди. Ушбу мактубда бош вазир Макронни Фаластин давлатининг халқаро тан олиниши тарафдори сифатида антисемитизмга ҳисса қўшаётганликда айблаган эди.
Шу билан бирга, Макрон илгари ҳам антисемитизмни очиқ танқид қилиб, уни француз қадриятларига зид, деб баҳолаган. Ғазо билан боғлиқ воқеалардан сўнг синагогалар ва яҳудий марказларида қўриқлаш чоралари кучайтирилган эди.
Маълумот учун, 2023 йил 7 октябрь куни ҲАМАС томонидан Исроил жанубига ҳужум уюштирилган. Унда 1 200 га яқин одам ҳалок бўлган, 251 киши гаровга олинган. Бу воқеадан сўнг Исроил Ғазога кенг кўламли ҳарбий операция бошлаган. Ғазодаги ҲАМАС бошқарувидаги соғлиқни сақлаш вазирлигига кўра, секторда ҳозирга қадар 60 мингдан ортиқ одам ҳалок бўлган.
Ғазо шаҳрида ўтган ҳафта очарчилик расман тасдиқланган. Глобал ташкилотлар маълумотларига кўра, секторда ярим миллиондан ортиқ аҳоли очарчилик, ночорлик ва ўлим хавфи остида яшамоқда. Исроил эса Ғазода очарчилик мавжудлигини рад этиб, бу борадаги ҳисоботни “бутунлай ёлғон” деб атаган.
Изоҳ (0)