Самарқанддаги маҳаллаларнинг бирида қурилган кўп қаватли бино тасвирлари ижтимоий тармоқларда тарқалиб, муҳокамаларга сабаб бўлганди. Қурилиш ва уй-жой коммунал хўжалиги вазирлиги мазкур бинонинг 1-қаватида ноқонуний қаҳвахона ташкил қилингани ҳақидаги хабарларга муносабат билдирди.
Ўрганишлар давомида чиндан ҳам бинонинг 1-қаватида ноқонуний равишда қаҳвахона фаолият юритаётгани аниқланган. Мазкур бино 2022 йилда ўтказилган текширувда бино ўзбошимчалик билан ҳеч қандай ҳужжатларсиз қурилгани, хавфсизлик талабаларига жавоб бермаслиги маълум бўлганди.
2022 йилнинг 6 июль куни фуқаролик ишлари бўйича Тойлоқ туманлараро суди томонидан бинони қурдирган фуқарога нисбатан уни ўз ҳисобидан бузиши тўғрисида ҳал қилув қарори берилган.
Вазирликнинг берган баёнотига кўра, бугунги кунда мазкур суд қарорининг ижроси МИБнинг Самарқанд тумани бўлими иш юритувида. Шунингдек, Самарқанд туман қурилиш бўлими томонидан 15 май куни 414-сонли хат билан МИБ Самарқанд туман бўлимига суд қарорининг ижросини таъминлаш бўйича хат йўлланган.
Ушбу бино Самарқанд вилояти Самарқанд тумани “Жойи сой” маҳалласида жойлашган бўлиб, фуқаро Ф.Х. ўз уйининг бир қисмини бузиб, жойидан 21,4х12,6 метр ўлчамдаги 11 қаватли, 2 қават ертўлали меҳмонхона қурган. Бино белгиланган тартибда шаҳарсозлик кенгашидан ўтмаган. Қурилишга рухсат берувчи Самарқанд тумани ҳокимининг қарори ёки туман қурилиш бўлимининг рухсатномаси, архитектура режалаштириш топшириғи мавжуд эмас.
Бундан ташқари, меҳмонхона мажмуаси объекти бош режасини натурага кўчириш далолатномаси расмийлаштирилмаган. Муҳандислик геологияси, лойиҳа-смета ҳужжатлари тўлиқ ишлаб чиқилмаган ҳамда тасдиқланмаган. Қурилиш объектида фойдаланилган қурилиш материалларининг талабларга мувофиқлиги тўғрисидаги паспорт ва сертификатлари тақдим этилмаган.
Февраль ўрталарида Тошкент шаҳри Янгиҳаёт туманида фуқаролар 10 қаватли уй томига уй қуриб олгани аниқланганди. Мазкур уйга хизмат кўрсатувчи бошқарув ташкилотларининг бир неча бор огоҳлантиришлари ҳам мулкдорларни ушбу фикрдан қайтармаган.
Изоҳ (0)