Тошкентда 3 қават қилиб қурилиши режалаштирилган бинода ноқонуний тартибда қўшимча 9 қават ва мансарда қурган тадбиркор аниқланди, деб хабар берди Қурилиш ва уй-жой коммунал хўжалиги вазирлиги.
Қайд этилишича, Учтепа тумани 23-мавзе ҳудудида буюртмачи “М.Г.Ҳ.” МЧЖ томонидан қурилаётган савдо ва маиший хизмат кўрсатиш мажмуасида қурилиш-монтаж ишларини бошлаш тўғрисида 2021 йилда назорат инспекциясига хабарнома юборилган. Тошкент шаҳар қурилиш бош бошқармасининг тегишли хулосаси билан бино эскиз лойиҳаси 3 қаватга келишилган.
2021 йилда эса ушбу объектда лойиҳадан четга чиққан ҳолда қўшимча қаватлар қурилиши аниқланган. Мазкур қоидабузарлик юзасидан бир неча марта ёзма кўрсатма ҳамда огоҳлантириш хатлари берилишига қарамасдан қурилиш ишларини давом эттирган.
Ҳозирда тадбиркор Маъмурий жавобгарлик тўғрисидаги кодекснинг 99-моддаси (шаҳарсозлик тўғрисидаги қонунчиликни бузиш) тегишли бандлари асосида жавобгарликка тортилган ҳамда ушбу объект юзасидан суд органларига даъво аризалари киритилган.
Февраль ўрталарида Тошкент шаҳри Янгиҳаёт туманида фуқаролар 10 қаватли уй томига уй қуриб олгани аниқланганди. Мазкур уйга хизмат кўрсатувчи бошқарув ташкилотларининг бир неча бор огоҳлантиришлари ҳам мулкдорларни ушбу фикрдан қайтармаган.
Изоҳ (0)