Шарофиддин Лолаев 23 май куни Термиз шаҳри ҳокими этиб тайинланди. Бу ҳақда Сурхондарё вилояти ҳокимлиги матбуот хизмати хабар берди.
Халқ депутатлари Термиз шаҳар Кенгашининг навбатдан ташқари сессиясида 2022 йил сентябридан буён Термизга ҳокимлик қилиб келган Ўктам Тўраев бошқа ишга ўтгани муносабати билан лавозимидан озод қилинди. Вилоят раҳбари таклиф этган номзод — Шарофиддин Лолаев депутатлар томонидан Термиз шаҳри ҳокими этиб тасдиқлади.
Шарофиддин Лолаев 1987 йилда Қумқўрғон туманида туғилган. 2015 йилда Термиз давлат университетини бакалавр, 2021 йилда магистр даражасини тамомлаган. Меҳнат фаолияти давомида Сурхондарё вилояти қурилиш соҳасида ҳудудий назорат инспекцияси бўлим бошлиғи, бош инспектори, биринчи ўринбосари, шунингдек, Денов тумани ва Термиз шаҳар ҳокимининг ўринбосари каби масъулиятли лавозимларда ишлаган. Тайинловга қадар Сурхондарё вилояти Қурилиш ва уй-жой коммунал хўжалиги соҳасида ҳудудий назорат қилиш инспекцияси бошлиғи вазифасида фаолият юритган.
Шу куни Халқ депутатлари Музработ тумани Кенгашининг навбатдан ташқари сессияси бўлиб ўтди. Сессияда 2024 йил сентайбридан буён Музработ тумани ҳокими вазифасини бажариб келган Алишер Қурбонов лавозимидан озод этилгани маълум қилинди. Вилоят ҳокими Улуғбек Қосимов ушбу лавозимга Абдулла Маматқулов номзодини таклиф этди. Таклиф туман Кенгаши депутатлари томонидан маъқулланди.
Абдулла Маматқулов 1985 йилда Олтинсой туманида туғилган. 2011 йилда Тошкент тўқимачилик ва енгил саноат институтини механик-технолог мутахассислиги бўйича тамомлаган. Меҳнат фаолияти давомида “Сурхондарё сув таъминоти” МЧЖ директорининг ўринбосари, Бандихон тумани ҳокимининг ўринбосари, “Сурхондарёсувқурилишинвест” ДУК директори каби масъулиятли лавозимларда ишлаган. Тайинловга қадар “Сурхондарё сув таъминоти” АЖ директори вазифасида фаолият юритган.
Изоҳ (0)