Ўзбекистонда тез орада олий ўқув юртларига қабул имтиҳонлари бошланади, сентябрь ойидан Тошкент шаҳри яна 100 минглаб талабалар билан тўлади. Табиийки, уларни ётоқхоналар билан таъминлаш масаласи яна кун тартибига кўтарилмоқда. Аввалги йилларда бу йўналишдаги ишлар яхши йўлга қўйилмагани сабабли хаос юзага келиб, кўплаб ўқувчилар бошпанасиз қолишига тўғри келганди. Олий таълим, фан ва инновациялар вазирлиги бундан тўғри хулоса чиқардими? Умуман, Тошкент шаҳри вилоятлик талабаларни қабул қилиб олишга қанчалик тайёр? Вазирлик матбуот хизмати раҳбари Назокат Абдуқундузова “Дарё”га шу ҳақда маълумот беради.
Айни пайтда қанча тураржойга эҳтиёж бор?
Тошкент шаҳрида талабалар сонининг йилдан йилга ортиб бориши фонида Олий таълим, фан ва инновациялар вазирлиги томонидан жорий йилда бу муаммони ҳал этиш мақсадида бир қатор амалий ишлар қилинмоқда. Жумладан, янги ётоқхоналарни қуриш, таъмирлаш учун зарур маблағлар ажратилган ва бугунги кунда 38 минг ўринли 83 та талабалар тураржойларини барпо этиш бўйича лойиҳалар амалга оширилмоқда.
Хусусан, давлат-хусусий шериклик асосида 23 минг 494 ўринли 50 та, олийгоҳ ва бюджет маблағлари, олийгоҳларнинг тўлиқ ўз маблағлари ҳамда инвестиция дастури доирасида 10 минг 660 ўринли 21 та талабалар тураржойлари қурилиши учун зарур маблағлар ажратилган. 2023 йил якунига қадар республика бўйича 18 минг ўринли талабалар тураржойларини фойдаланишга топшириш вазифаси белгиланган.
Ҳозир неча ўринли ётоқхоналар мавжуд?
2023 йил 1 июль ҳолатига кўра, 4 минг 702 ўринли 12 та талабалар тураржойлари фойдаланишга топширилган. Айни пайтда 24 минг 394 ўринли 51 та талабалар тураржойлари қурилиши давом этмоқда. Жорий йилнинг сентябрь ойи, яъни янги ўқув йили бошланишига қадар республика бўйича жами 6 минг 400 ўринли 11 та талабалар тураржойлари фойдаланишга топширилади.
Жумладан, Тошкент шаҳридаги Талабалар шаҳарчаси ҳудудида жами 3 та 1 800 ўринли талабалар тураржойларида қурилиш, таъмирлаш ишлари тўлиқ якунланиб, фойдаланишга топширилади:
- Ўзбекистон миллий университети учун 400 ўринли;
- Тошкент давлат техника университети учун 600 ўринли;
- Тошкент тиббиёт академияси учун 800 ўринли.
Йил якунига қадар давлат дастурида белгиланган 18 минг ўринли талабалар тураржойлари ҳам тўлиқ қуриб битказилади.
Талабалар тураржойлари қандай тақсимланади?
Ҳар йили сентябрь ойининг биринчи ўн кунлигида талабалар тураржойларини тарқатиш, тақсимлаш жараёнида навбатлар ҳосил бўлиши кузатилади. Бу йил ушбу ҳолатнинг олдини олиш мақсадида белгиланган тартиб ва мезонларга мувофиқ юқори курс талабаларига ётоқхоналар олдиндан тақсимланди. Бунда 1-босқич талабаларига ТТЖдаги ўринларнинг 60 фоизи сақлаб қолинади.
Шу тартибда барча курслар билан қўшиб ҳисоблаганда Тошкент шаҳрида 42 минг 300 нафар ёки 27 фоиз талабалар мавжуд 100 та талабалар тураржойларига жойлаштирилади.
Талабаларнинг ижара уйларда туриш тартиби қандай бўлади?
Ҳозирги кунда 48 минг 976 нафар талабалар (30 фоиз) тураржойга муҳтож бўлиб, улар ижара шартлари асосида хусусий хонадонларда яшашига тўғри келади. Тюторлар назоратида 23 минг 774 нафар талабалар (2, 3, 4-курслар) Тошкент шаҳрида ижара хонадонга жойлашган. Яъни уларнинг аксарияти аввалдан яшаб келаётган ижара уйларини сақлаб қолишган ёки олдиндан ижара уйларини банд қилиб қўйишган.
Шу ҳолатда ижара хонадонларига жойлашишга муҳтож бўлган (ётоқхонадан жой берилмаган, ўз уйи, яқин қариндоши мавжуд бўлмаган ва ижара хонадони ҳам аниқ бўлмаган) талабалар 25 минг 202 нафарни ташкил этмоқда. Ана шу таҳлиллардан келиб чиқиб, олий таълим муассасаларида барча тюторларни тўлиқ жалб қилган ҳолда маҳалла раислари билан ҳамкорликда бўш турган ижара хонадонларини топиш ишлари амалга оширилган.
Уй эгалари билан бирма-бир суҳбатдан кейин жами 8 минг 438 та ижара хонадонларининг манзилли рўйхати шакллантирилган. Ҳисоб-китобларга кўра, мазкур хонадонларга 24 минг 254 нафар талабани жойлаштириш имкони мавжуд.
Айни пайтда қолган 948 нафар талабага қўшимча ижара уйларини топиш ишлари давом этмоқда. Бўш турган ижара хонадонлари тўғрисидаги манзилли рўйхат барча талабаларга етказилмоқда.
Ижара хонадонларига жойлашган талабаларга ижара тўловининг бир қисмини қоплаб бериш ишлари амалдаги тартиб асосида давом эттирилади.
Шу тартибда янги ўқув йилида талабаларни таъмирланган ва бўш турган ижара хонадонларига жойлаштириш ишлари ташкил этилади ва кириш имтиҳонлари якунланиши билан, яъни 20 август куни талабалар қаерда яшаши мумкинлиги ҳақида аниқ маълумотга эга бўлиши таъминланади.
Жорий йилнинг 25 августига қадар талабаларни ётоқхона билан таъминлаш жараёнини тўлиқ якунлаш кўзда тутилмоқда ва бу борада кунлик мониторинг йўлга қўйилган.
Талабалар Тошкент Индекс мажмуасидан бу йил ҳам фойдаланадими?
2022/2023-ўқув йилида Тошкент шаҳар ҳокимлиги томонидан Янгиҳаёт туманидаги “Индекс” савдо мажмуасида ташкил этилган вақтинчалик ётоқ жойларида талабалар учун зарур шарт-шароитлар мавжуд эмаслиги сабабли жорий ўқув йилида бу вариантдан фойдаланиш кўзда тутилмаган.
Ётоқхоналар ҳисобини юритиш реестри ишга тушадими?
Шунингдек, талабаларни тураржойга онлайн жойлаштириш имкониятини берувчи ахборот тизими ҳам ишлаб чиқилмоқда. Мазкур ахборот тизимида олий таълим муассасаларининг ётоқхоналар ҳисобини юритиш реестри шакллантирилиб, олий таълим муассасаси томонидан ҳар бир талабалар тураржойининг манзили ва қуввати, талабалар тураржойида курслар ҳамда факультетларга ажратилган ўринлар сони мунтазам киритиб борилади.
Изоҳ (0)