Президент Шавкат Мирзиёев раислигида 16 июнь куни ўтказилган видеоселектор йиғилишида аҳолини қийнаётган кўплаб долзарб муаммолар – газ таъминоти, тирбандлик, қурилишлар, болалар ўйингоҳлари, қабулхоналар фаолияти, яшил ҳудудлар ва бошқа масалаларда янги ташаббуслар илгари сурилди.
Қуйида, бизнинг фикримизча, одамлар кундалик ҳаётда тўқнашаётган 10 та асосий муаммолар бўйича давлат раҳбари томонидан берилган янги ечимлар, ташаббуслар ва қатъий вазифалар ҳақида қисқача маълумот берамиз.
1. Яшил ҳудудлар, болалар майдончалари бузилмайди
Давлат раҳбари томонидан кўп қаватли уйлар орасидаги ўйингоҳлар, яшил ҳудудлар қурилиш учун тадбиркорларга бериб юборилаётгани танқид қилинди.
Қайси ҳудудда “яшил” майдонлар, спорт ва болалар ўйингоҳлари бошқа мақсадлар учун ажратилган бўлса, уларни аниқлаб тегишли чоралар кўриш бўйича масъулларга кўрсатма берилди.
2. Тирбандликлар камаяди, “ақлли” камера ва светофорлар кўпаяди
Темир йўл шлагбаумлари, нотўғри светофорлар ва камералар сабаб автомобиллар соатлаб тирбандда қолмоқда. Камералар фақат жарима учун эмас, ҳаракатни бошқариш, тирбандлик ва аварияни камайтириш учун ишлайдиган тизимга айланади.Чорраҳа, чизиқ ва йўл белгилари, светофорларни “ақлли” бошқарувга ўтказиш ишлари жадаллаштирилади.
3. Аҳолига суюлтирилган газ етказишдаги муаммолар қисқа муддатда бартараф қилинади
Андижон ва Сурхондарёда суюлтирилган газ таъминоти билан боғлиқ муаммолар кескин танқид қилинди. Газ бир неча ҳафталаб етказиб берилмаётгани кўрсатиб ўтилди.
Давлат раҳбари аҳолига суюлтирилган газни узлуксиз етказиб бериш борасида қисқа муддатда ижобий натижаларга эришиш бўйича қатъий топшириқ берди. Шунингдек, мутассадиларга аҳолини қишда газ билан таъминлашда муаммолар юз бермаслиги учун ҳозирдан тайёргарлик бошлаш топширилди.
4. Халқ қабулхоналари аҳоли муаммоларига жойида ечим топадиган тизимга айлантирилади
Халқ қабулхоналари энди мурожаатни фақат бошқа идораларга юбормайди. Президент бу тизим бутунлай ўзгариши, ҳокимлар ҳар куни иш кунини Халқ қабулхонасида фуқаролар билан мулоқотдан бошлаши кераклигини билдириб ўтди. Ҳокимлар муаммоларни имкон қадар кейинги кунга ўтказмасдан шу куннинг ўзида жойида ҳал қилиш чораларини кўради.
5. Сув ва канализациядаги муаммолар тезкор ҳал қилинади
Сув тармоғидаги авариялар 4-5 кунга чўзиляпти. Соҳага ажратилаётган маблағлардан унумли фойдаланиб керакли материаллар олдиндан тайёрлаб қўйилади ва таъмирлаш ишлари тезлашади. Бу соҳада ҳам хизмат сифати янада оширилади.
6. Электр энергияси тежалади, аҳолига “яшил таъмир” кредити берилади
Энергия самарадорлигини ошириш учун янги агентликка бюджетдан 100 миллиард сўм ажратилган.
Эндиликда, давлат хизматчиларига энергия самарадор технологияларга ўтиш учун “яшил таъмир” кредит, субсидия ёки ссуда берилади.
Президент йил якунига қадар камида 100 минг хонадонни энергия самарадор тизимга ўтказиш лозимлигини билдирди.
7. Гўшт, сут ва тухум нархининг ошмаслиги учун чоралар кўрилади
Гўшт, сут, тухум ва парранда гўшти нархлари ошмаслиги учун тадбиркорларга ҚҚСнинг ярмини қайтариш механизми жорий қилинди.
Корхоналар “соя”дан чиқиб ишлаши учун бу тизим катта ёрдам беради. Президент ушбу механизм аниқ, бир кунга ҳам кечиктирмасдан ишлаши лозимлигини қайд этди. Нархни барқарор ушлаб туролмаган раҳбарларга чора кўрилади, лозим бўлса – ишдан олинади.
8. Солиқчилар уйма-уй юрмайди, тушунтиришга эътибор қаратилади
Маҳаллий солиқчилар уйма-уй юриб ер, мол-мулк ва сув солиқларини ундиришга 70–80 фоиз вақтини сарфлаяпти. Бу ҳолат самарасиз деб баҳоланди.
Эндиликда солиқ тизимида тушунтириш, ҳуқуқий маданиятни оширишга кўпроқ эътибор қаратилади. Солиқ тўлаш мажбурият эмас, Конституциявий бурч сифатида талқин қилинади.
Маҳаллада ер, мол-мулк, сув солиқларини ундиришнинг янги механизмини ишлаб чиқилади.
9. Ҳокимликларда маош ҳам, масъулият ҳам оширилади
Ҳоким, унинг ўринбосарлари ўз вазифаларини тўлиқ бажарса, кейинги йил ҳудудга бериладиган маблағ 10-15 фоиз кўпайтирилади.
1 августдан барча вилоят ва туман ҳокимликларида иш ҳақи оширилади, ходимларга ишига қараб ойлик устама ва қўшимча бонус берилади. Лекин натижа бўлмаса, ҳеч кимга имтиёз йўқ – ишдан бўшатишгача чора кўрилади.
10. Аҳоли муаммолари “Халқ назорати” электрон тизими орқали ҳал қилинади
Тошкентда синовдан ўтган “Халқ назорати” мобил платформаси эндиликда барча ҳудудларда ишга туширилади.
Фуқаролар йўл, инфратузилма, ободонлаштириш каби муаммоларни суратга олиб, жойи ва маълумоти билан илова қилиб юбориши мумкин бўлади. Масаланинг ҳал этилгани ҳам фотосурат орқали тасдиқланади. Ҳокимлар иши айнан шу тизим орқали баҳолаб борилади.
Д.Ражабоев,
юрист, эксперт
Изоҳ (0)