Ижтимоий тармоқларда Тошкентнинг Миробод туманидаги Матбуотчилар уйи сотилгани ва бузилаётгани ҳақида хабарлар тарқалди. Ҳолат юзасидан Қурилиш ва уй-жой коммунал хўжалиги вазирлиги изоҳ берди.
Маълум қилинишича, мазкур объект ва унга туташ ҳудудда замонавий медиа-шаҳарча ташкил этиш мақсадида реконструкция ишлари амалга оширилмоқда.
Қайд этилишича, президент қарори ва ҳукумат қарорига асосан ушбу реконструкция ишлари бўйича архитектура-режалаштириш топшириғи ишлаб чиқилган.
“Архитектуравий қиёфасини яхшилаш мақсадида ҳамда шаҳарсозлик қоидалари билан Матбуотчилар уйи биносини замон талаблари асосида лойиҳа ишлаб чиқилиб, тасдиқланган”, дейилади хабарда.
Қўшимча қилинишича, ҳозирда объектнинг бетон-панел кўринишидаги қисмлари демонтаж қилиниб, каркас ҳолатига келтирилган.
“Келгусида Матбуотчилар уйи биносини энерготежамкор, замонавий технологиялар билан жиҳозлаш, қулай шарт-шароитлар яратиш ҳамда замонавий кўринишга олиб келиш мақсад қилинган”, дейилган изоҳда.
Матбуотчилар уйи ҳақида
Матбуот уйининг умумий майдони 0,82 гектар бўлиб, бино-иншоот қисми 18 142 метр квадратни ташкил этади. Мазкур объект 2018 йилнинг апрель ойида ҳам сотувга қўйилган эди. Ўшанда Тошкент шаҳрига янги тайинланган Жаҳонгир Ортиқхўжаев бинонинг аукцион савдосида сотилишини тўхтатган эди.
Кейинчалик 2019 йил ноябрида Тошкент шаҳри марказида жойлашган Матбуот уйи биноси 18,75 миллиард сўм нарх билан иккинчи марта аукционга қўйилган. Аммо бу маълумот очиқ аукцион сайтидан олиб ташланган. 2021 йилнинг ноябрь охирларида Давлат активларини бошқариш агентлиги Матбуот уйининг давлат активлари бўйича оммавий савдо жараёнлари бошланганини эълон қилганди.
2021 йилнинг декабрь ойида Матбуот уйининг маъмурий биноси сотилмайдиган бўлгани ҳақида хабар берилганди. 21 декабрь куни президент матбуот котиби Шерзод Асадов бир гуруҳ босма матбуот нашрлари бош муҳаррирлари билан учрашган. Унда босма матбуот — газета ва журналлар фаолиятига оид муаммолар, янги таклифлар муҳокама қилинган. Шерзод Асадовнинг маълум қилишича Матбуот уйи биноси узил-кесил сотувдан олинган. Бино келгусида оммавий ахборот воситалари, жумладан, босма нашрларга қолдирилади.
Изоҳ (0)