Disney ва Pixar Том Хенкс, Тим Аллен ва Жоан Кюсакнинг “Ўйинчоқлар тарихи 5” фильмидаги қаҳрамонларни овозлаштиришга қайтганини тасдиқлади. Улар, шунингдек, янги қаҳрамонларнинг пайдо бўлишини эълон қилишди, бироқ аниқ маълумотлар берилмади.
Кейинги қисмда саккиз ёшли Бонни унинг дунёсини бутунлай ўзгартирадиган планшет олади. Эски ўйинчоқлар учун бу қурилма ҳақиқий ёвузга айланади, чунки у туфайли қизалоқ уларга эътибор бермай қўяди. Бироқ улар таслим бўлишни хоҳламайди ва қизнинг қалбига қайта йўл топиш режасини ишлаб чиқади.
Фильмнинг давоми 2026 йил 19 июнда экранларга чиқиши кутилмоқда. Эслатиб ўтамиз, машҳур франшиза 18 та “Оскар” номинациясига сазовор бўлган ва 3 та ҳайкалчани қўлга киритган.
Дисней, шунингдек, янги оригинал лойиҳа — “Гатто” мультфильмини эълон қилди. Воқеалар Венецияда кечади, у ерда йиллар давомида денгиз қирғоғи бўйлаб кезиб юрган қора мушук ўз ҳаётининг маъноси ҳақида ўйлай бошлайди. Мушуклар мафияси бошлиғи билан боғлиқ муаммолар уни кўча рассоми билан дўстлашишга ва эрксеварлигига қарамай, уй ҳайвонига айланишга мажбур қилади.
Режиссёр “Лука” фильмининг муаллифи Энрико Касароса бўлади. Услуби бўйича мультфильм қўлда чизилган анимацияга яқин туради. Премьера 2027 йил июнь ойига белгиланган.
Изоҳ (0)