“Дарё” Ўзбекистон Республикаси товар-хом ашё биржасида ўтказилган энг яхши танлов ва тендерлар ҳужжатларини мониторинг қилишда давом этади. Ўтган ҳафта давомида ҳам бир қатор шубҳали ҳолатлар аниқланди. Қуйида энг эътиборга молик савдолар ҳақида маълумот берамиз.
Бош прокурор ўринбосари ўзи тасдиқлаган талабни бузди
27 февраль – 6 март кунлари Бош прокуратура бинолар ва спорт соғломлаштириш марказига хизмат кўрсатиш бўйича бошланғич қиймати 1.1 миллиард сўмлик энг яхши таклифни танлаш харидини ўтказди. Ғолиблик учун “PR Комфорт климат Сервис”, “Моrе” ҳамда “Аir and Expert” МЧЖ курашган.
Якунда ташкил этилганига бир ярим ой бўлмаган “PR Комфорт климат Сервис” масъулияти чекланган жамияти ғолиб деб топилиб, 938 миллион сўмлик шартномани тузиш имкониятига эга бўлди.
Ваҳоланки, комиссия раиси тасдиқлаган техник ҳужжатнинг 5.3 бандига кўра, корхона давлат реестрида рўйхатга олинганига уч йил бўлмагани сабабли танловга қўйилмаслиги лозим эди.
Афсуски, четлаштириш ўрнига унга барча мезонлар бўйича юқори баҳолар қўйилган. Чунки ғолиб бегона эмас. Унинг эгаси уч йилдан буён Бош прокуратурага инолар ва спорт соғломлаштириш марказига хизмат кўрсатиш бўйича аутсорсинг хизматини кўрсатиб келаётган “Climatе Comfort Service” МЧЖ раҳбари Гуламбай Авазов ҳисобланади.
Демак, бу ерда манфаатлар тўқнашуви бўлиши мумкин.
Ишламаётган корхона 113 миллионлик тендерни ютиб олди
Ўрганган кўнгил ўртанса қўймас, деганларидек, Дўстлик туман ободонлаштириш бошқармаси давлат харидига оид қонунчилик талабларини бузишда давом этади.
Аввалги ҳафтада ўтказилган тендерда ташкил қилинганига 4 кун ҳам бўлмаган корхона ғолиб бўлган бўлса, ўтган ҳафтада 2022 йилдан буён фаолият кўрсатмаётган МЧЖ шартнома тузишга муваффақ бўлган. Қандай дейсизми?
Бошқарма 27 февраль 6 март кунлари профил ва алкофон сотиб олиш бўйича бошланғич қиймати 113 миллион сўмлик тендер ўтказган. Унда “Всёстрой”, “Асил-Шоҳжаҳон” МЧЖ ҳамда якка тартибдаги тадбиркор Улуғбек Сатторовлар қатнашган.
Харид комиссияси хулосасига кўра, “Асил-Шоҳжаҳон” МЧЖ ғолиб деб топилган.
Статистика агентлиги маълумотига кўра, корхона МЧЖ Жиззах вилояти, Шароф Рашидов тумани, “Зиёкор” маҳалласи рақамсиз уйда жойлашган. Шунингдек, маълумотда ушбу корхона фаолият кўрсатмаётгани қайд этилган.
Қўшничилик — минг йилчиликми?
Китоб туман мактабгача ва мактаб таълими бўлими 26 февраль 5 март кунлари боғчалар учун иситиш қозони ва унга зарур бўладиган маҳсулотларни сотиб олишга иккита танлов ўтказди. Уларнинг умумий бошланғич қиймати 271,7 миллион сўмни ташкил этган. Шартнома имзолаш учун “Boond” хусусий корхонаси ва “Парижская Камуна”, “Аvtо Service Office” МЧЖлар беллашган. Якунда “Боонд” хусусий корхонаси ғолиб деб топилган.
Танлов маълумотларини кўздан кечириш давомида буюртмачи ва ғолиб ўртасида боғлиқлик борлиги аниқланди. Хўш, буларнинг қандай боғлиқлиги бор?
Гап шундаки, ғолиб фирма Китоб тумани, Китоб шаҳри, Буюк ипак йўли кўчаси, 60-уйда рўйхатдан ўтган. Буюртмачи ҳам худди шу кўчада, фақат беш-олти уй нарироқда, 48-уйда жойлашган. Яъни, пуллар бегона кетмаган.
Товар-хом ашё биржасига жойлаштирилган битимларга кўра, Мактабгача ва мактаб таълими бўлими томонидан 2022—2025 йилларда амалга оширилган 53 хариднинг 19 тасида “Boond” ғолиб бўлган.
Маҳалладошлар нима дейди?
Навоий вилоят кўп тармоқли тиббиёт маркази томонидан ўтказилган тендерларда эса икки маҳалладош рақобатлашган.
Бошланғич қиймати 17,3 миллион сўм бўлган танловлар 24 февраль 3 март кунлари ўтказилган. Ғолиблик учун “Create nеw ideas” МЧЖ ҳамда “Донёр бобо 2020” хусусий корхонаси курашган. 7 март куни расмийлаштирилган баённомага кўра, биринчи иштирокчи 17,2 миллион сўмлик шартнома суммаси билан тендерларни ютиб олган.
Ғолиб фирма Навоий вилояти, Кармана тумани, “Варқ” маҳалласи, Сангбур кўчаси, 37-уйда жойлашган.
Тасодифлар тасодифан бўлмайди, деганлари рост, рақиб “Донёр бобо 2020” хусусий корхонаси ҳам айнан “Варқ” маҳалласида, фақат бошқа кўчада фаолият юритади.
Яна қўшнилар рақобати
Наманган педагогика коллежи 17-24 февраль кунлари компьютерларни таъмирлаш хизматини кўрсатиш бўйича 15 миллион сўмлик танлов ўтказди. Хизмат кўрсатиш учун “Ўн ҳаёт траде” ва “Релиабле-селлер” МЧЖлар даъвогарлик қилган. Ғалаба “Релиабле-селлер” МЧЖга насиб қилди.
Эътиборлиси, иккала иштирокчи ҳам Наманган шаҳри, “Нурафшон” МФЙ, Истиқлол кўчаси, 8-уйда жойлашган. Статистика агентлиги маълумотларига кўра, ғолиб 6-7-сонли дўконда, захира ғолиби эса 3-дўконда ихтисослашмаган улгуржи савдо билан шуғулланади.
Хитойликлар Сирдарёда беллашди
23-28 февраль кунлари Сирдарё вилоятининг Боёвут тумани Ободонлаштириш бошқармаси йўл қурилиш автогрейдери сотиб олиш учун энг яхши таклифни танлаш харидини ўтказган. Бошланғич қиймати 1,1 миллиардни ташкил этади.
Танловда “Sevalo Supply Chain”, “Grand Truck Group”, “Sany Automobile Manufacturing Central Asia”, “Mechanical United Service” ҳамда “Эма Чина Техника Service” МЧЖлар беллашган. Якунда “Ema China Texnika Service” МЧЖ ғолиб деб топилган.
Барча иштирокчилар Тошкент шаҳрининг Сергели туманида жойлашган. Янада қизиғи эса МЧЖларнинг тўрттаси хитойлик инвесторларга тегишли.
Бундан кўриниб турибдики, чин юртидан келган тадбиркорлар ўзаро беллашган.
Масъуллардан ушбу шубҳали тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.
Харидларни кузатишда давом этамиз.
Изоҳ (0)