Жиззах вилоятининг Пахтакор тумани, “Пахтакор” маҳалласида яшовчи шахснинг турар жойи ички ишлар ходимлари томонидан кўздан кечирилди. Бу ҳақда вилоят ИИБ матбуот хизмати хабар берди.
Мазкур жараёнда фуқаро уйида икки туп каннабис етиштираётгани аниқланди. Шунингдек, унинг уйидан гиёҳванд моддаси истеъмол қилишга мослаштирилган икки дона сув идиши, совуқ қуроллар таркибига кирувчи икки дона пичоқ, 19 дона пиротехника воситаси ҳамда гиёҳванд моддаларни ўлчаш учун мос тарози топилди. Ушбу тарозидан фуқаро гиёҳвандлик воситаларининг оғирлигини ўлчашда фойдалангани тахмин қилинмоқда.
Фуқаро терговга қадар суриштирувни ўтказаётган ички ишлар ходимига 500 доллар пора таклиф қилади. Бу пул эвазига ходим жиноят ишига оид ҳужжатларни тергов органларига ўтказмаслиги ҳамда суриштирувни тўхтатиши керак бўлган.
Ўтказилган тезкор тадбирда фуқаро ходимга 200 доллар ва 3,9 млн сўм берган вақтида ушланди.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)