Тожикистондан Ўзбекистонга 14,5 кило гиёҳванд модда олиб ўтаётган шахс қўлга тушди (видео)

Ўзбекистонга Тожикистондан контрабанда йўли билан 26 килодан ортиқ гиёҳвандлик воситалари олиб келингани аниқланди.

Давлат хавфсизлик хизматининг Чегара қўшинлари ҳарбий хизматчилари томонидан хизматнинг Тошкент вилояти бўйича бошқармаси ҳамда божхона идоралари билан ҳамкорликда ўтказилган тезкор тадбирда, 1986 йилда туғилган Тожикистон фуқароси ўзбек-тожик давлат чегарасини қонунга хилоф равишда бузиб ўтган вақтида тўхтатиб қолинган.

Унга тегишли сумка кўздан кечирилганда, 15 дона ўрамдаги жами 14 кило 584 грамм гашиш моддаси борлиги аниқланиб, процессуал тартибда расмийлаштириб олинган.

Шундан сўнг, уни буюртма қилган шахсни аниқлаш юзасидан тезкор тадбир давом эттирилди. Натижада Фарғона вилоятининг Тошлоқ туманида яшовчи, 1969 йилда туғилган шахс Бекобод туманида наркотик моддани қабул қилиб олган вақтида ашёвий далиллар билан ушланган.

Бошқа ҳолатда эса, хизматнинг Фарғона вилояти бўйича бошқармаси ходимлари томонидан ички ишлар ҳамда божхона органлари билан ҳамкорликда ўтказилган тезкор тадбирда Тошкент вилоятининг Бекобод туманида яшовчи, 1992 йилда туғилган шахс қўшни давлатдан контрабанда йўли билан олиб келинган 9 кило 467 грамм опий моддасини сотган вақтида ашёвий далиллар билан қўлга олинган.

Терговга қадар текширув давомида тожикистонлик наркокурер томонидан Сурхондарё вилояти ҳудудига контрабанда йўли билан етказиб берилган наркотик моддани Денов туманида яшовчи, 1994 йилда туғилган фуқаро қабул қилиб олиб, Тошкент вилоятига олиб келгани аниқланган ва у ҳам процессуал тартибда ушланган.

Қўқон шаҳрида қайд этилган ҳолатда, Фарғона—Қўқон йўналишида ҳаракатланаётган Lacetti тўхтатилиб, холислар иштирокида кўздан кечирилганда Қўқон шаҳрида яшовчи, 1967 йилда туғилган йўловчи ўзининг бел қисмига 1 кило 759 грамм гашиш яшириб олгани аниқланган.

Фарғона шаҳрида кузатилган ҳолатда эса, Фарғона—Тошлоқ йўналиши бўйлаб ҳаракатланаётган, 1995 йилда туғилган шахс бошқарувидаги “Запарожес” тўхтатилиб, холислар иштирокида кўздан кечирилганда, унинг салон қисмида 995 грамм гашиш борлиги аниқланган ва тегишли тартибда расмийлаштириб олинган.

Ўтказилган тезкор тадбирлар натижасида жами 26 кило 805 грамм гиёҳвандлик воситалари ашёвий далил сифатида олинган. Улар Тожикистондан контрабанда йўли билан олиб келинган.

Ҳозирда ушбу шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди. Май ойининг бошларида Сирдарё, Наманган ва Андижон вилоятларида қарийб 88 килограмм гиёҳвандлик моддаларни олаётган шахслар ушланганди.