Камбағалликни қисқартириш ва бандлик вазирлигининг Андижон шаҳар бўлими бошлиғи иш вақтида кабинетида психотроп модда истеъмол қилгани ҳақида хабар берилган эди. Ҳолат юзасидан қўшимча маълумотлар берилди.
Унга кўра, Андижон шаҳри Камбағалликни қисқартириш ва бандликка кўмаклашиш бўлими бошлиғи Д.У. ҳамда унинг ўринбосари С.Б. билан меҳнат шартномаси бекор қилинди. Ҳолат юзасидан тергов ҳаракатлари давом этмоқда.
Камбағалликни қисқартириш ва бандлик вазирлигининг Андижон вилояти бошқармаси ахборот хизмати расмдаги шахс бошқарманинг Андижон шаҳар бўлими бошлиғи эканини тасдиқлаган эди.
Камбағалликни қисқартириш ва бандлик вазирлиги ахборот хизмати раҳбари Гулноза Алимова воқеадан хабардорлигини, ҳолатга аниқлик киритишга уринаётганини очиқлади.
Ўрганяпмиз, деди у таҳририятнинг бу ҳақдаги саволига қисқа жавоб берар экан.
Ички ишлар вазирлиги ахборот хизматининг қўшимча қилишича, ўтказилган тезкор-қидирув тадбири жараёнида фуқародан жами 0,69 гр гашиш гиёҳвандлик моддаси олинган. Ҳозирда ҳолат юзасидан Андижон шаҳар ИИО ФМБ томонидан Жиноят кодексининг 276-моддаси 1-қисми билан жиноят иши қўзғатилган. Тергов ҳаракатлари олиб борилмоқда.
“Дарё”да мазкур вазирлик ходимлари ҳаракати билан сохта иш ўринлари яратилаётгани, фуқароларнинг шахсий маълумотлари интернетда сиздирилаётгани ҳақида сўз юритилган мақола эълон қилинганди.
Изоҳ (0)