Сирдарё, Наманган ва Андижон вилоятларида қарийб 88 кг гиёҳвандлик моддаларни олаётган шахслар ушланди, деб хабар берди ИИВ матбуот хизмати.
Маълум қилинишича, Тошкент ва Сирдарё вилоятларида ўтказилган тезкор тадбирларда 1971 йилда туғилган фуқаро Л. ҳамда 1994 йилда туғилган шахслар Сирдарё туманидан ўтган йўл четида, дала майдонидаги яширилган жойдан 3 дона қора сумкага жойланган, гиёҳвандлик воситаларини олаётган вақтида ушланди.
Тадбир давомида жами оғирлиги 77 кг 410 грамм гиёҳвандлик моддалари олинди.
Наманган вилоятида ўтказилган тезкор тадбирда 1989 йилда туғилган фуқаро Р., Х. ва 1990 йилда туғилган А. Учқўрғон туманида яширилган жойдан 5 кг гиёҳвандлик воситаларини олаётганда ушланди.
1998 йилда туғилган фуқаро Т. ва 1984 йилда туғилган С. Андижон вилоятининг Пахтаобод туманидаги дала майдонида яшириш йўли билан кўмиб қўйилган 5 кг синтетик гиёҳвандлик воситаларини олаётганда ушланди.
Тезкор тадбир давом эттирилиб, гумонланувчиларнинг яшаш манзили ҳам холислар билан кўздан кечирилди. Натижада умумий оғирлиги 364 грамм гиёҳвандлик воситалари, граммларга ажратилиб, сотиш учун ишлатиладиган пакетлар, ноутбуклар далилий ашё сифатида олинди.
Барча ҳолатлар юзасидан Жиноят кодексининг 273-моддаси билан жиноят иши қўзғатилган. Гумонланувчиларга нисбатан қамоққа олиш тарзидаги эҳтиёт чораси қўлланилган.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)