Тошкент вилоятининг Оҳангарон шаҳрида ЙПХ инспектори томонидан тўхтатилган автомашинада гиёҳванд моддаси борлиги аниқланди. Бу ҳақда вилоят ЙҲХБ хабар берди.
Маълум қилинишича, ЙПХ инспектори томонидан светофорнинг тақиқловчи ишорасига амал қилмасдан ҳаракатланган ҳайдовчи, 1984 йилда туғилган Р.У бошқарувидаги Tracker тўхтатилиб текширилди.
Фуқаро Р.У. ҳайдовчилик гувоҳномасидан маҳрум этилганлиги маълум бўлди. Шундан сўнг ҳайдовчи ва автомашина холислар иштирокида кўздан кечирилганда ҳайдовчининг олдида рангсиз селофанга ўралган, ўткир ҳидли, яшил рангли наша гиёҳванд воситасига ўхшаш модда борлиги аниқланди.
Дастлабки суриштирувларга кўра, ушбу модданинг соф оғирлиги 47,26 граммни ташкил этган.
Фуқаро ва ашёвий далиллар шаҳар ИИБга топширилди.
“Қорадори-2025” тадбири ҳақида
Бу ДХХ ва ИИВ томонидан ташкил этилган кенг қамровли тезкор-профилактик тадбир бўлиб, мамлакат бўйлаб гиёҳвандлик воситаларининг ноқонуний муомаласига қарши курашишга қаратилган. Тадбирнинг асосий мақсади гиёҳванд моддалар ва кучли таъсир қилувчи дориларни ноқонуний тарқатиш, сақлаш ва етиштириш билан шуғулланаётган шахслар ва гуруҳларни аниқлаш, уларнинг фаолиятига чек қўйишдир.
2025 йил 3–4 февраль кунлари ўтказилган дастлабки босқичда республика бўйлаб 653 та махсус тадбир ўтказилди. Улар давомида жами 112 кило 257 грамм гиёҳвандлик воситалари (героин, опий, гашиш, синтетик моддалар) ва 8 601 дона кучли таъсир қилувчи дорилар мусодара қилинди.
Изоҳ (0)