Мехико шаҳар ҳокимининг икки юқори даражадаги ёрдамчиси мототранспортдаги қотиллар томонидан отиб ўлдирилди. Бу ҳақда Reuters хабар қилмоқда.
Маълум қилинишича, 20 май куни Мехико шаҳри марказида мототранспортдаги қуроллилар томонидан уюштирилган ҳужум натижасида шаҳар мэри Клара Бругаданинг икки юқори даражадаги ёрдамчиси отиб ўлдирилган.
Қурбонлар шаҳар ҳокимининг шахсий котибаси Химена Гусман ва унинг маслаҳатчиси Хосе Мунос экани маълум қилинди.
Сиёсий зўравонлик Мексиканинг кўпгина ҳудудларида одатий ҳолга айланган, у ерда ўнлаб маҳаллий сиёсий номзодлар одатда камайтирилиши мақсад қилган гиёҳвандлик картеллари томонидан ўлдириб келинмоқда.
Дастлабки хабарларга кўра, Гусман ишга йўл олган ва Мехико шаҳри марказидаги гавжум проспектда ўз ҳамкасбини олиш учун тўхтаган. Федерал прокуратура идораси расмийсининг айтишича, Мунос мотоциклда келган икки қуролли шахс томонидан кўчада ўлдирилган. Қотиллар сўнгра автомобиль ичида бўлган Гусман томонга камида тўрт марта ўқ узиб, уни ҳам ўлдиришган.
Мехико шаҳри фуқаролик хавфсизлик бошқармасининг маълум қилишича, ҳужум жойидан узоқ бўлмаган ерда бир мотоцикл ва Изтакалко туманида яна бир автомобиль мусодара қилинган. Терговчилар воқеа жойидаги ўқ-дорилар ва бармоқ изларига оид далилларни текширмоқда.
Мехико шаҳар ҳокимиятининг расмийси Reuters’га маълум қилишича, ҳужум содир бўлган пайтда шаҳар мэри Клара Бругада автомобилда бўлмаган. Бругада жиноятни содир этганлар жазосиз қолмаслигини билдирган.
“Бу Клара (Бругада)га йўналтирилган қаттиқ сигнал бўлди. Шубҳасиз, буни гиёҳванд моддалар билан шуғулланувчи гуруҳлар амалга оширган”, деди жамоат хавфсизлиги бўйича мутахассис Давид Сауседо.
Унинг сўзларига кўра, аввал ҳам гиёҳванд моддалари мусодара қилинган гуруҳлар пойтахт расмийларига қарши ҳужумлар уюштирган.
11 май куни, Мексиканинг Веракрус штатидаги Тексистепек шаҳри мери лавозимига номзод Есения Лара Гутеррес отиб ўлдирилди. Қотиллик содир этилган пайтда у сайловчилар билан учрашув ўтказаётган эди. Аёл билан бирга яна уч киши ҳам ҳалок бўлган.
CNN ўшанда Мексикадаги сайлов даврларида сиёсий номзодларга ҳужум қилиш одатий ҳол эканлигини таъкидлаган эди. 2024 йил май ойида жанубий Герреро штатида сайловолди тарғиботи пайтида муниципал мерликка номзод ўлдирилган эди.
Мексикада сиёсатчиларга ҳужумлар
ОАВнинг қайд этишича, Мексикада сиёсатчиларнинг ўлдирилиши одатда наркокартеллар фаолияти билан боғланади. 2024 йили мамлакатда сиёсий-жиноий зўравонлик қурбонларининг рекорд сони қайд этилди. Ҳуқуқ ҳимоячилари 661 та ҳужум ҳақида хабар берди.
2024 йил октябрь ойида Мексиканинг Чилпансинго шаҳри мери лавозимга тайинланганидан бир ҳафта ўтиб ўлдирилди. Ўлимидан бир неча соат олдин Алехандро Аркос бўрон туфайли ёмғирдан зарар кўрган Чилпансинго атрофидаги аҳоли пунктларига борганди. Йил бошидан буён Мексикада ўнлаб сайловолди кампанияси иштирокчилари ҳалок бўлди.
Изоҳ (0)