Тошкент вилоятида 15 апрелдан 15 майгача “Хавфсиз ва соғлом юрт” шиори остида кенг қамровли тезкор-профилактик тадбирлар ўтказилди. Бу ҳақда вилоят ИИББ матбуот хизмати хабар берди.
Тадбирлар натижасида гиёҳвандлик моддаларининг ноқонуний муомаласи билан боғлиқ 243 та ҳолат аниқланди. Тадбирлар давомида 39,3 кг гиёҳвандлик воситаси ҳамда 9 058 дона кучли таъсир қилувчи дори воситаси муомаладан олинди.
Наркотик моддаларни тарғиб қилувчи 1 218 та чизилган граффити ёзуви аниқланиб, ўчирилди. Шунингдек, кучли таъсир қилувчи дори ва синтетик гиёҳвандлик воситалари “закладка”си билан шуғулланган 20 нафар шахс ушланди.
Шу билан бирга, 9 дона ўқ отар, 21 дона пневматик қурол ва 283 дона ўқ-дорилар далилий ашё сифатида мусодара қилинди. 1 546 та ҳолатда ноқонуний сақланаётган совуқ қурол аниқланиб, 1 600 та ўткир тиғли жисм тегишли тартибда ҳужжатлаштирилиб олинди.
Йўлларда 48 мингдан зиёд қоидабузарлик ҳолати қайд этилди, шундан 11 мингдан ортиғи қўпол турдаги қоидабузарлик ҳисобланади. 446 та ҳолатда ҳайдовчилар маст ҳолатда транспорт воситасини бошқаргани, 2 800 та ҳолатда эса ҳайдовчилар тегишли ҳужжатсиз транспорт воситасини бошқаргани аниқланди.
Қўриқлаш хизмати бўйича 2 723 та объект, жумладан 2 371 та хонадон ва 352 та ижтимоий муассаса техник қўриқловга олинди. Шунингдек, тергов ва суд органларидан яшириниб юрган 84 нафар қидирувда бўлган шахс қўлга олиниб, 45 нафар бедарак йўқолган фуқаро топилди ва оилаларига қайтарилди.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)